GISULTI sa usa ka opisyal gikan sa Commission on Elections-Davao Region (Comelec-Davao) nga ang katapusang adlaw sa rehistrasyon sa Barangay and Sangguniang Kabataan Election (BSKE) hapsay bisan pa nga dunay pipila ka aplikante nigukod sa panahon.
Kini maoy gitug-an ni Comelec-Davao assistant regional director Atty. Gay Enumerables.
"Kay gitabangan ta sa atong mga mall management... thankful ta dirang dapita because daghan ang mitabang sa atoa para mahapsay atong registration," butyag ni Enumerables.
Atol sa katapusang adlaw sa rehistrasyon, molupyo sa unang distrito sa siyudad midugok sa SM City Davao samtang sa SM Lanang Premier mga molupyo sab sa ikaduhang distrito. Molupyo sa ikatulong distrito miadto sab sa Magsaysay Park.
Daghan gihapon nga mga tawo ang naglinya aron nga makarehistro bisan ug ulahi na busa mga satellite offices nakahukom nga ipatuman ang "cut-off" pinaagi sa "numbering system".
"Dagsa jud ang tao, ang pila sa tao dasok," dugang tug-an ni Enumerables nga naghulagway sa paglinya atol sa rehistrasyon sa dihang nibisita siya kagahapon.
Samtang gikanayon ni Enumerables nga mapasalamaton siya sa tanang mga hingtungdan ug mga partners kinsa nakighiusa og trabaho sa Comelec-Davao aron nga ang rehistrasyon mahapsay ug malampuson.
Matud ni Enumerables nga alang sa Davao Region, dunay mga 110,000 transaksiyon ang nahitabo sukad Enero 30 - kini naglakip sa rehistrasyon, transfer of residence, reactivations, ug information corrections.
Gibutyag niya nga dunay kalit nga pag-brownout nga nahitabo sa Magsaysay Park mga udto kagahapon, kon diin ang mga botante sa ikatulong distrito nagdasok. Hinuon, dali ra sab kining naresolba.
"Na-resolve man siya dayon within a few minutes," saysay niya.
Gitin-aw ni Enumerables nga sa pagkakaron, ang Comelec Main Office wala pa mipagwas og memorandum aron lugwayan ang BSKE registration.
Ang BSKE sa Pilipinas gitakda sa Oktubre 30, 2023.