GIHINGUSGAN karon ang programa sa Department of Social Welfare and Development (DSWD) Davao Region sa pag-amoma sa kabataan nag-edad 0-6 anyos.
Kini pinaagi sa Centers and Residential Care Facilities (CRCFs) sa DSWD-Davao nga mao ang Reception and Study Center for Children (RSCC).
Tinguha sa RSCC ang paghatag og temporaryo nga puluy-anan sa mga gi-abandona, gipasagdan, ug gisurender nga mga kabataan nga nag-edad 0-6 anyos.
Katuyoan sab sa RSCC ang pagtubag sa mga nag-unang panginahanglan sa mga kabataan ug pagpahiluna kanila pinaagi sa pagbalik sa pamilya, foster care o ang legal adoption.
Sa kasamtangan, 46 ka mga bata ang giatiman sulod sa RSCC nga nahimutang sa Friendship Road, SPMC Compound, Bajada, Davao City.
Upat ka CRCFs sa DSWD-Davao ang nakakab-ot na sa Level 3 Accreditation.
Alang sa dugang impormasyon, mamahimo kamong motawag sa (082) 222-2873. (JPC, PR)