Usa ka simbahan nga ‘unique’ og patakaran para sa manimbahay.
Dili na lang nato hisgotan og asa kining maong simbahan basta nga ang nakalahi niini sa uban kay aircon ang maong simbahan.
Dili sila mosugot nga anha sa gawas ang manimbahay, kinahanglan nga adto gyod sa sulod sa simbahan.
Adunay numero nga ihatag inig sulod ug ang nakadawat adto gyod molingkod sa lugar nga maoy nahimutang sa iyang numero.
Pinahimutang gyod kaayo sa sulod ug adunay daghang mga nag-bantay nga masunod gyod kini.
Tuod, hapsay kaayo sa sulod.
Kasagaran, on-time gyod magsugod ang misa sanglit adunay daghang mga parokyano nga nagbantay sa gawas ug sa sulod.
Ang maulahi, dili na makasulod kay sirad-an man ang pultahan sa simbahan.
Ang maulahi, dili sab pwede mag-estambay sa kilid o sa gawas kay gidili man kini.
Nindot unta kini kay pinahimutang man ang pagsimba sa maong simbahan.
Apan dili tanang panahon moabot sa tukmang oras ang manimbahay, adunay panahon nga malangan gyod ang pag-abot sa simbahan.
Ang malangan, dili na pwede mosimba kay dili na man kasulod sa simbahan.
Tungod niini, dili gyod malikayan nga adunay magbagotbot sa maong sistema kay mas importante pa man nila ang pagsunod sa lagda kay sa pag-ampo ug pagpasalamat sa Labaw nga Makagagahom.
Magbagutbot sab ang uban kay mas komportable sila sa open-air ug dili sila moangay sa aircon nga simbahan ug maoy hinungdan nga anha lang unta sila sa kilid sa simbahan ug dili na lang mosulod.
Apan tungod sa mga nagbantay nga istrikto mopatuman sa ilang reglamento, mogawas na lang ang gusto unta nga mosimba bisan sa kilid lang.
Ang ilang reklamo kay imbes unta padaghanon pa nila ang mosimba, ila na man hinuon nga i-limit pinaagi sa ilang mga lagda sa simbahan.
Maayo unta pod og adunay notices nga gibutang aron mabasa sa kadaghanan ang maong patakaran sa simbahan ug mahibalo sila nga adunay sistema nga gisunod.
Kon imong tan-awon sa tibuok lugar sa simbahan, walay notices nga gibutang nga nagpahibalo sa katawhan o manimbahay nga adunay mga lagda nga sundon ang manimba sa maong simbahan.
Kadtong igo lang mibisita sa maong lugar unya igo lang nag-online para makita ang schedule sa mga simbahan nga mahimong sudlan sa maong oras mogawas nga makaluluoy kay kon maulahi sila og abot dili na man sila makasulod ug dili na sab maka-simba bisan sa kilid lang.
* * *
Lisod sabton usahay ang patakaran sa mga simbahan.
Dihay namatay unya kinahanglan pamisahan sa Katoliko sa dili pa ilubong.
Pag-abot sa simbahan, gi-interview ang hingtungdan bahin sa namatay ug nahibaw-an nga wala kini malista sa “envelope system.”
Tungod niini, nagdumili ang pari nga misahan ang namatay kay wala man sa lista. Bisan sa pangaliyupo nga gihimo sa mga hingtungdan, mibalibad gyod ang pari nga momisa.
Gibalik-balik og sulti sa pari nga mao kana ang patakaran sa mga parokyano sa maong lugar.
Nasulbad lang ang maong problema sa dihang dihay “midupa” sa pamilya sa namatay ug maoy mihangyo sa pari nga misahan na lang.
Ang “midupa” maoy usa sa mga kusog mohatag og ayuda sa maong simbahan, ug mao tingali ang hinungdan nganong kusgan ang tingog sa maong parokyano.
Tuod man, namisahan gyod ug nalubong sa sam-ang Katoliko ang namatay nga wala maapil sa lista sa “envelope system.”
Unsay leksiyon nga makuha niining maong estorya?
* * *
Milihok na sab ang kagaw sa cha-cha (Charter change).
Adunay nagplano nga usbon na sab ang batakang balaod. Ang pangutana, motunhay kaha kining maong plano?
Kon kahinumdoman, kadaghan na kini giplano nga buhaton sa mga nangaging administrasyon apan wala kini motunhay.
Mas bug-at ang tingog sa mga misupak sa maong plano ug wala gyod kini matuman.
Usa sa mga hinungdan nga wala kini motunhay mao ang wala pagkasinabot kon unsang paagi himoon ang pag-usab, pinaagi ba sa constitutional convention o constituent assembly.
Kon constitutional convention, ang mga sakop sa kasamtangan nga kongreso mao ra sab ang mga sakop sa grupo nga mo-usab sa batakang balaod.
Kon constituent assembly, magpili og mga delegado nga molingkod sa maong grupo nga mousab sa batakang balaod.
Bisan asa sa duha, adunay mga maayo ug dili maayo nga punto ug lisod hukman kon asa gyod sa duha ang mas maayo.
Ang pangutana karon - ubos sa pamunoan ni BBM (Bongbong Marcos), motunhay kaha kining maong plano nga pag-usab sa batakang balaod?