Magpadayon sa ilang pagbiyahe ang di mominos 170 ka mga modernized public utility jeepney (MPUJ) nga nagbiyahian sa Metro Cebu.
Kini human ang Land Transportation Franchising and Regulatory Board (LTFRB-7) pinaagi ni Regional Director Eduardo Montealto Jr., niisyu sa Regional Office Order Number 2023-R7-001 nga maoy nag-extend sa ilang mga special permit hangtod sa Biyernes, Pebrero 3, 2023.
Ang tanang special permits gilugwayan aron paghatag og igong panahon sa pag-file ingon man pagbayad sa gikinahanglang fees alang sa pag-renew sa special permits.
“All Special Permits are deemed cancelled if the operator has an unsettled pending violation. No Special Permit is tantamount to colorum operations. This shall take effect immediately,” tipik sa order nga giluwatan ni Montealto.
Si Governor Gwendolyn Garcia sa lalawigan sa Sugbo nipatawag og tigom nga gitambungan ni Montealto uban nilang Talisay City Mayor Gerald Anthony “Samsam” Gullas, Consolacion Mayor Teresa “Nene” Alegado, ug Minglanilla Mayor Rajiv Enad aron sulbaron ang problema sa 170 ka MPU,J kansang special permit ni-expire kagahapon, Enero 31.
Ang tigom gituyo ni Garcia aron masulbad ang problema ug kakuwangan unya sa mga MPUJ nga nagbiyahian sa maong mga lungsod ug siyudad sa libuan ka mga pasahero nga nanarbaho sa siyudad sa Sugbo ug kasikbit nga mga dapit.
Ang nahisgutang mga MPUJ nagbiyahian gikan sa City of Naga, Minglanilla, City of Talisay, Liloan, Consolacion paingon sa IT Park sa Cebu City ug vice versa.
Sa unang mga interbyu sa Superbalita Cebu, si Montealto nagkanayon nga kanunay nilang i-extend ang mga special permit sa mga MPUJ ngadto sa mga rota nga wa pay units nga regular nga nagbiyahian sanglit wala pa maaprobahi ang ilang tagsa-tagsa ka mga local public transport route plan.