Adunay usbaw sa generation charge nga nagpaabot sa mga konsumidor sa power distributor nga Mactan Electric Company (MECO) sa buwan sa Marso.
Ang generation charge may kalabutan sa mga bayranan alang sa produksyon sa elektrisidad.
Si Engr. Gilbert Pagobo, Senior Vice President ug General Manager sa MECO, mipahibalo niadtong Martes, Enero 31, 2023, pinaagi sa usa ka press conference nga ang kasamtangang rate sa kuryente sa P12 matag kilowatt hour (kWh) mosaka ngadto sa labing menos 30 ngadto sa 50 porsiyento o kapin o kulang P15/ kWh.
Buot ipasabot kon ang usa ka konsumidor adunay average nga 200 kWh nga konsumo sa kuryente sulod sa usa ka buwan, P3,000 ang iyang bayran sa iyang bayranan sa kuryente gikan sa P2,400.
Gipasabot ni Pagobo nga kini nunot sa pagkaguba sa ilang nag-unang linya sa kable sa kuryente nga nahimutang sa kinasang-an sa Ouano ug U.N Avenue sa Mandaue City.
Ang maong lugar adunay duha ka operating cable lines nga gipadagan sa National Grid Corporation of the Philippines (NGCP) nga nagsuplay og kuryente sa Mandaue City ubos sa Visayan Electric Company (VECO) ug ang usa alang sa Meco.
Sumala pa ni Pagobo nga naigo ang line 2 nga maoy nagsuplay og kuryente sa tibuok dakbayan sa Lapu-Lapu ug Munisipyo sa Cordova nunot sa nagpadayong road projects sa Department of Public Works and Highways (DPWH) sa maong dapit.
Matud niya nga nakig-coordinate na sila sa NGCP labot sa pag-ayo sa cable line, apan wala pa silay nadawat nga feedback gikan sa ahensya ingon man sa DPWH.
Gawas sa pag-umento, si Pagobo miingon nga ang mga konsumidor mahimo usab nga makasinati og sunodsunod nga pagkawala sa kuryente gikan sa labing menos usa ngadto sa duha ka oras kada adlaw, posible, sa pagsugod sa panahon sa ting-init hangtod nga maayo ang kable.
Gihatagan niya og gibug-aton nga niining mga panahona, mitaas ang konsumo sa kuryente sa mga konsumidor, nga malisod alang sa Meco sa pag-regulate sa nahabilin nga mga tinubdan sa kuryente, gawas sa mga nadaot.
Matud ni Pagobo nga ila nang ibutyag ang mga lugar nga maapektuhan sa nagtuyok-tuyok nga brownouts. Iyang gipasabot nga lakip niini ang mga dagkong establisemento sama sa Gaisano Mactan Island Mall, Gaisano Grand Mall Mactan, Waterfront Airport Hotel & Casino Mactan, Jpark Island Resort and Waterpark, ug Shangri-La Mactan, ug uban pa.
Si Cordova Vice-Mayor Victor “Boyet” Tago nagplano nga mopalabang og resolusyon ngadto sa Sangguniang Bayan, nga nag-awhag sa NGCP, Energy Regulatory Commission (ERC), ug sa DPWH sa paghatag og katin-awan sa nahitabo, sanglit ang pagkapalong sa kuryente makaapekto sa tibuok Isla sa Mactan.
Gihangyo usab niya ang mga ahensya nga maghimo og usa ka permanente nga solusyon aron dili na mahitabo ang susamang mga insidente.
Dugang pa ni Tago nga mangayo siya og tabang ni Gobernador Gwendolyn Garcia aron dunay manubag sa mga nahitabo.
Si Pagobo niingon nga ila na kining gipadangat ngadto kang Lapu-Lapu City Mayor Junard “Ahong” Chan.
Matud niya kombinsihon ni Chan ang dagkong mga establisemento nga ipaambit ang ilang mga generator sa ilang duol nga residential areas.
“Among gitambagan usab ang mga konsumidor nga magdaginot sa kuryente kutob sa ilang mahimo,” matud ni Pagobo.
Ang Meco maoy nagsuplay og kuryente sa tibuok dakbayan sa Lapu-Lapu nga naglakip sa Isla sa Olango ug Munisipyo sa Cordova. (HIC)