Masinati na karon sa mga motorista ang maayong dagan sa trapiko sa downtown area sa dakbayan sa Sugbo human ang Colon Night Market mihunong na sa ilang operasyon.
Apan dili kini magdugay tungod kay ang mga nag-organisar sa merkado sa kagabhion nipasalig sa publiko nga ang labing karaan nga dalan sa nasud bahaan na usab sa pagkaon ug mga tawo sa umaabot nga mga bulan.
Ang Public Information Office sa Cebu City Transportation Office (CCTO) niingon kaniadtong Martes, Enero 31, 2023, nga moluag ang trapiko sa maong kalsada sa higayon nga mahawan na sa mga naninda.
“Sa pagsira o pagtapos sa Colon Night Market, ang mga motorista nga moagi sa Colon (street) adunay kasayon o maayo nga dagan. Though after 7 pm, ang Colon Street will become usually light,” matud sa CCTO sa SunStar Cebu.
Sa laing bahin, si Maria Pino sa Cebu City United Vendors Association nitug-an sa SunStar Cebu sa Martes, nga ang temporaryong pagpahunong sa night market aron nga makapahuway ang dalan Colon human gi-abli ang night market sulod sa kapin sa duha ka buwan sukad niadtong Nobiyembre 2022.
Ang night market napuno sa nagkadaiyang mga baligya nga pagkaon nga gipahaom sa Sinulog celebration, apan niadtong Lunes, Enero 30 nihunong na ang operasyon. (IRT)