Selos ang hinungdan kon nganong giabis sa 58 anyos nga biyudo ang liog sa iyang live in partner nga manindahay og mangga sa Osmeña Boulevard, atbang sa Luym building sa Cebu City sa Lunes sa alas 2:10 sa hapon, Enero 30, 2023.
Ang biktima nga si Bernadeta Zamora, 54, biyuda, taga Barangay Sapangdaku, dakbayan sa Sugbo, naa sa talandugon nga kahimtang human giingong hiwaa ang liog niini sa suspek nga si Edwin Salazar.
Nadakpan ang suspek sa Guadalupe Police Station human sa ilang gilusad nga follow up operation.
Matud ni Edwin sa interview sa sibyaanang dyHP RMN Cebu sa programang Straight to the Point, nga iyang gihimo ang krimen tungod sa selos.
Giangkon ni Edwin nga nagselos siya niadtong Sinulog, Enero 15, 2023 kay dunay lalaki nga gikaatubang sa biktima nga nagkidhat-kidhat niini.
Naa, matud pa, siya sa luyo sa biktima ug naklaro niya nga daw nag-estoryahanay ang duha pinaagi sa sinyas.
Una nang nagduda si Edwin nga dunay laing gikabuangan si Bernadeta tungod kay dili na siya pakuyogon sa pagpaninda sa mangga sa rason, matud pa, nga nagkamuritsing na lang ang iyang dagway.
“Pagkakita nako ato, ako giingnan nga mao diay nga dili nako nimo pakuyogon kay naa diay kay kasabot. Nagsinyas-sinyas man sila nga paadtuon lagi kuno, wala sad ko kabalo kon asa moadto,” matud ni Edwin.
Gihulagway niya ang maong lalaki nga maoy nakagusto sa iyang live in partner nga mubo ug bulingit og hitsura nga namaligya og tubig sa dapit, apan natingala siya nga niadtong Sinulog nagpagwapo kini.
Sukad niadto magsige na, matud pa, og pangisog kaniya ang iyang kapuyo ug mamasangil na kaniya nga manguha nag kwarta.
Wala na usab kini mouli sa ilang payag sa Sapangdaku bisan unsaon niya og tawag ug hangyo nga makig-estorya aron mahusay silang duha.
Giangkon usab niya nga mangabubho siya kon dunay lalaki nga makig estorya kang Bernadeta.
Gani iya na kining gipahimangnoan nga dili gyud motutok sa mga gwapo nga lalaki ug macho og lawas.
“Maniid man gud ko sa mga lihok niya. Ako siya giingnan nga ayaw tutok-tutok anang mga laki labi nag mga macho, mga gwapo. Ayaw ana, ayaw’g tutok-tutok kay ngil-ad man paminawon,” dugang ni Edwin.
Wala na, matud pa, siya kaagwanta, iya lang unta kini nga hadlukon ug samaran gamay gamit ang kutsilyo nga pangpanit sa mangga ug hiwa sa kapayas apan gigunitan, matud pa, sa biktima ang kutsilyo hangtod nga naabis hinuon ang liog niini.
Bisan sa hitabo, gihigugma gihapon ni Edwin si Bernadeta ug nagbasol na siya sa iyang gihimo.
Ang Waterfront Police Station mosang-at nagsumbong ngadto sa piskaliya sa Pebrero 1, 2023 sa kasong frustrated murder.
Matud ni Police Colonel Ireneo Dalogdog, hepe sa Cebu City Police Office, naa pa sa talandugon nga kahimtang ang biktima ug segun sa nag-atiman niini nga doktor, ipaubos sa operasyon ang liog niini.
“Ang kaso nga pwede natong ma file is frustrated murder in relation to RA 9262 kay dili man ni sila kasal, live in partner lang ni sila. But that will depend on the situation of the victim. Kon ang victim mamatay, ma elevate, mahimong murder ang atong ipasaka,” dugang ni Dalogdog.
Sa video nga nikatap sa social media nga kuha sa CCTV sa dapit, makita ang pag-abis sa suspek sa liog sa biktima nga dali usab nga gitabang sa mga tawo sa palibot.
Nakadayeg si Dalogdog sa usa ka babayeng tinun-an nga kon basehan ang uniporme niini, usa ka nursing ang kurso, nga wala gyud mobiya nga maoy misampong sa samad nga dili makaagas ang dugo hangtod nga nadala kini sa tambalanan.