Subay sa iyang #PAGPAKABANA, ilabi na sa mga naapektuhan sa kalamidad ug katalagman, ang Department of Social Welfare and Development (DSWD) Field Office VII nihatag og P1,031,687.50-balor nga hinabang sa mga pamilyang naapektuhan sa managlahing mga insidente sa sunog sa Barangay Ibo ug Babag sa dakbayan sa Lapu-Lapu sa Enero 16 ug 18, 2022.
Sa Sitio Commonwealth, Barangay Ibo, matag usa sa 167 ka mga pamilya nga gilangkuban sa 486 ka indibidwal nakadawat og family food packs, family clothing, hygiene kits, kitchen kits, sleeping kits, ug laminated sacks nga mokabat sa kinatibuk-ang P 891,135.50.
Ang local government unit (LGU) sa Lapu-Lapu City nanghatag usab og hot meals, bottled water, modular tents nga adunay insulation foams, beds, portalets, non-food items lakip na ang hygiene kits, food packs, ug medical assistance.
Nagkadaiyang mga ahensya sama sa Department of Public Works and Highways (DPWH), Philippine Air Force (PAF), Criminal Investigation and Detection Group (CIDG) ingon man ang Philippine National Red Cross (PNR), ug usa ka non-government organization ninghatag usab og tabang.
Ang tanang apektadong mga pamilya temporaryong gipasilong sa Ibo Gymnasium nga nagsilbi nga evacuation center.
Samtang, ang 26 ka apektadong mga pamilya sa sunog nga miugdaw sa Purok Super Sunlight, Barangay Babag nakadawat og family food packs, hygiene kits, ug kitchen kits nga mokabat sa kinatibuk-ang P134,552.
Ang LGU Lapu-Lapu City nihatag usab og init nga mga pagkaon, ug mga kitchen set, nipahigayon og libreng medical check-up, ug play therapy alang sa mga bata.
Ang mga pamilya kasamtangang nag-okupar sa Babag Gymnasium isip temporaryong kapuy-an.
Ang DSWD-7 City Action Team sa dakbayan sa Lapu-Lapu mitabang usab sa pagdumala sa duha ka evacuation camps, pagmonitor sa kahimtang sa pagpuyo sa internally displaced nga mga pamilya, ug pagtigom og mga datos aron isumiter ngadto sa Disaster Response Management Division alang sa Disaster Response Operations Monitoring and Information Center (DROMIC) report.
Ang DROMIC report nagpakita sa datos sa gimonitor nga mga insidente ug mahimong magsilbi nga basehan sa pagdugang sa suporta ug paghatod sa mga hinabang ngadto sa mga dapit nga naapektuhan sa kalamidad sa nagkalainlaing sektor sama sa nasyonal nga gobyerno, lokal ug internasyonal nga organisasyon, ug pribadong institusyon. (PR)