Gipangulohan ni San Miguel Beermen center June Mar Fajardo ug Brgy. Ginebra Gin Kings guard Scottie Thompson ang premirong inihapay sa All-Star votes alang sa Philippine Basketball Association (PBA).
Gianunsyo sa PBA kagahapon, Pebrero 1, 2023, nga nakahakot si Fajardo og 37,915 votes samtang sikit nga nagsunod si Thompson dala ang 37,759 votes.
Nagsugod ang botasyon sa online ug on-site niadtong Enero 25 ug mahuman kini karong Pebrero 15.
Ang PBA All-Star festivities ipahigayon karong Marso 9-12 sa Passi City, Iloilo.
Ning higayuna, gisunod sa PBA ang format sa All-Star Game sa NBA diin ang duha nga makahakot sa labing daghang mga boto mao ang mahimong team captains sa duha ka mga All-Star nga puwersa.
Pormahon sa team captains ang ilang tagsatagsa ka puwersa pinaagi sa pagpili sa magsunod nga 22 ka mga magduduwa nga makakuha sa labing daghang mga boto.
Sa kasamtangan, si Ginebra center Japeth Aguilar naa sa ikatulo nga adunay 37,322 votes unya nagsunod sila si Ginebra forward Jamie Malonzo (32,998) ug Calvin Abueva sa Magnolia Chicken Timplados Hotshots (32,503).
Nasulod sab sa Top 10 sila si CJ Perez sa San Miguel (31,184), Christian Standhardinger sa Ginebra (29,821), James Yap sa Rain or Shine Elasto Painters (28,117), ug ang pointguards sa Ginebra nga sila si LA Tenorio (28,027) ug Stanley Pringle (27,441).
Ang boto sa fans mao sab ang basihan sa pagpili og mga magduduwa nga mopakita og aksyon sa Rookies-Sophomores-Juniors game.