NAPUHAG sa Regional Special Enforcement Team (RSET) sa Philippine Drug Enforcement Agency (PDEA) Davao, uban ang National Bureau of Investigation (NBI) Davao, South Eastern Mindanao Regional Office ug Police Precinct 3-Talomo Police Station, ang hideout sa paggamit og ilegal nga druga.
Ang gihimong hideout mao ang usa ka balay sa Sta. Monica Street, Purok Sto. Niño, Buhangin ning Siyudad sa Davao.
Pasado alas 9 sa gabii niadtong Enero 30, 2023, malampuson ang raid diin wala kaikyas ang mga giingong drug den maintainer nga giila sa kapulisan nga si Jay Cal, 49, minyo ug nagpuyo sa dapit, kinsa nakuhaan og gituohang shabu balor P6,000.
Atol sa operasyon, naatlan ang mga drug den visitors nga sila Joel Cal ug Cesar Ang, pulos hamtong ang pangedaron kinsa gipangsikop sab human naaktuhan nga nag-shabu session.
Samtang sa Davao del Sur, balhog sab sud sa prisohan ang tulo ka mga lalaki atol sa drug buy-bust operation sa mga sakop sa Digos City Police Station, kauban ang Regional Police Drug Enforcement Unit (RPDEU)-Davao Region mga alas 10:47 sa gabii, Enero 31, didto sa Purok Palmera, Roxas Street, Barangay Zone 2, Digos City.
Giila ni Police Captain Diosdado Niones II ang mga suspek nga silas Mc Win Macaresa alyas Win, 36, Clifford Cañada alyas Pong, 30, ug Jamail Pacalma alyas Mael, 28.
Mga suspek napalitan og usa ka pakite sa gituohang shabu ug nakuhaan sa lain pang upat ka mga pakite.
Napasakaan na og kasong pagsupak sa Republic Act (RA) 9165 kun Comprehensive Dangerous Drugs Act of 2002 ang mga suspek.
Sumala sa awtoridad, nga ilaha pang pakusgan ang ilang intel-monitoring sa ilang mga area of responsibility sanglit migara na sab ang ilegal nga druga sa komunidad.