DUMOT ang gitan-aw nga motibo sa mga awtoridad sa pagpusil-patay sa usa kakonsehal alas 12:25 sa udto, Lunes, Oktubre 24, 2022, sa Datu Montawal, Maguindanao del Sur Province.
Giila ang biktima nga si Mubarac "Moby" Abubakar sa nahisgutang lungsod.
Sumala kang Maguindanao Police Provincial Office Director Colonel Noel Sermese nga bag-o lang nakanaug si Abubakar sa iyang Strada pickup sa Sitio Kurungan, Barangay Pagagawan, Datu Montawal ug nakig-istorya sa naninda sa kilid sa national highway dihang kalit niabot ang duha ka wala mailhing suspek ug gipusil siya gamit ang kalibre .45 nga pistola.
Daling misibat ang mga suspek sakay sa motorsiklo paingon sa hilit nga dapit sa Datu Montawal.
Gidala dayon ang biktima sa Deseret Hospital sa Kabacan, Cotabato Province apan wala na kini maluwas human nakaangkon og samad pinusilan sa ulo.
Nasayran nga si Abubakar maoy unang konsehal sa nahisgutang lungsod sa Maguindanao del Sur ug siya sab ang tsirman sa Committee on Peace and Order.
Hustisya ang singgit karon sa pamilya sa konsehal nga gipusil-patay sa posibleng kaaway niini.
Samtang gikondena ni Datu Montawal Mayor Datu Ohto Montawal ug mimando sa kapulisan sa paghimo og lawom nga imbestigasyon sa krimen.