GIKONDENA ni Mayor Datu Ombra Ramil Dilangalen ug mga miyembro sa Sangguniang Bayan ang pagpatay kang Northern Kabuntalan Municipal Councilor Tans Nanalon, 43, minyo, sa Maguindanao del Norte alas 10 sa gabii niadtong Martes, Enero 31, 2023.

Gibutyag ni Maguindanao Police Provincial Office Director Colonel Roel Sermese nga gikan si Nanalon sa peryahan ug mihapit sa bisperas sa kasal sa iyang paryente sa Barangay Damatog sa maong lungsod.

Pauli na unta ang biktima sa iyang balay sa diha nga kalit mibutho ang duha ka wala mailhing tawo ug nagpusil kaniya tumong sa ulo, likod ug abaga nga namatay gilayon.

Hustisya karon ang singgit sa pamilya sa biktima samtang kapulisan sa Northern Kabuntalan Municipal Police Station padayon sa ilang imbestigasyon aron nga matumbok ang nagpaluyo sa pagpatay sa konsehal.