SUBAY sa target sa Asian Waterbird Census (AWC) alang sa CY 2023, ang Community Environment and Natural Resources Office (Cenro) sa Matalam nilusad og sensus sa mga waterbirds sa Barangay Dugong, M'lang, Cotabato Province.
Gipangunahan kini sa Protected Area and Wildlife Unit (Pawu) Chief Forester Rosie R. Camiguing, kauban ang PAWU support personnel ug usa ka composite team gikan sa Provincial Environment and Natural Resources Office (Penro) Cotabato.
Adunay 14 ka species sa migratory birds ug 12 ka laing species nga naobserbahan nga dunay kinatibuk-ang 1,423 ka indibiduwal ang natala sa team atol sa 2 ka adlaw nga monitoring on-site.
Kini mao ang yellow Bittern, Intermediate Egret, Black-winged Stilt, Whiskered Tern, little Egret, brown Shrike, common Sandpiper, purple Swamphen/Western Swamphen, Wood Sandpiper, Javan pond Heron, white-breasted Waterhen, purple Heron, water Rail, Chinese Egret, great Egret, yellow vented Bulbul, Philippine Coucal, brown breasted Kingfisher, Barn Swallow, Zebra Dove, Swiftlets, Chestnut Munia, white-collared Kingfisher, common Kingfisher, blue-tailed Bee-eater, ug brown Dove.
Ang mga lugar nga nasakop sa panahon sa census naglakip sa mga fishpond, freshwater swamps, rice fields ug marshes.
Ang tinuig nga datus sa pag-ihap sa mga langgam sa tubig ug impormasyon sa site girekord sa mga porma sa sensus nga standard.
Usa ka ihap ang gihimo sa matag site (Site 1, 2, 3 & 4) nga gibisita sa miaging mga tuig. Ang nasangpit nga kalihokan sa AWC naglaum nga makahatag og basehanan sa pag-ihap sa populasyon sa mga langgam sa tubig, sa ilang kahimtang sa konserbasyon, ug pagmonitor sa mga kausaban sa gidaghanon sa mga species.
Tumong sa maong aktibidad nga madugangan ang kaamgohan sa kamahinungdanon sa mga langgam sa tubig ug sa ilang mga puy-anan sa basakan sa lokal, nasyonal ug internasyonal nga lebel.