Nikabat sa 64 ka mga menor de edad ang naluwas sa padayong hugot nga pagpatuman sa curfew gikan sa alas 10:00 sa gabii hangtod sa alas 4:00 sa kaadlawon sa Lungsod sa Minglanilla sa Martes, Enero 31, 2023.

Ang ‘one time big time operation’ sa kapulisan gisuportahan sa 19 ka mga barangay sa lungsod ug mga tanod.

Si Police Major Arieza Otida, hepe sa Minglanilla Police Station nga nangulo sa maong kalihukan, niingon nga ang mga bata nga ilang naluwas nagpangidaron og 13 ngadto sa 17 anyos.

Sagad sa mga naluwas sa mga menor de edad kasagaran naabtan sa nagkadaiyang internet cafes sa nahisgutang lungsod.

Matud ni Otida, ang mga menor dili pasakaan og kaso tungod sa ilang pangidaron apan gipasidan-an bahin sa dili pagsubli sa paglapas sa balaud lakip sa paghatag og atensiyon sa mga ginikanan