Mopatawag si Lapu-Lapu City Mayor Junard “Ahong” Chan og executive session uban sa lainlaing stakeholders kalabot sa sugyot sa Mactan Electric Company (Meco) nga usbawan ang ilang power rates ingon man pagpahamtang og rotating brownouts sa Marso ning tuiga.
Si Chan nitug-an sa SunStar Cebu sa Miyerkules, Pebrero 1, nga mopatawag siya og sesyon sunod semana uban sa Meco, National Grid Corp. of the Philippines (NGCP), ug Sangguniang Panlungsod.
“Dili ra man ni karon lang naigo, ikatulo naman ni. Unsaon man nato nga dili na ni mausab? Kay og magsige na ni og kaigo, magsige na og sakripisyo sa kuryente sa Lapu-Lapu,” matud ni Chan.
Gawas kanila, ang mayor niingon nga imbitahon usab niya ang contractor sa nagpadayon nga road project sa Department of Public Works and Highways (DPWH) nga nakaigo sa main electric cable line sa power distributor nga nahimutang sa mga eskina sa Ouano Ave. ug UN Avenue sa dakbayan sa Mandaue.
Kini human si Engineer Gilbert Pagobo, senior vice president ug general manager sa Meco, nipahibalo niadtong Martes, Enero 31, 2023 nga mopausbaw sa ilang rates tungod sa gipaabot nga pagsaka sa panginahanglan sa kuryente panahon sa ting-init, kadaot nga dala sa linya sa kable nga nagsuplay og kuryente sa Meco, ug ang pagtaas sa labing menos 50 porsiyento sa presyo sa ‘nodal price’ sa Meco tungod kay ang naguba nga kable giisip na nga naghuot.
Gikan sa kasamtangang P12 matag kilowatt hour (kWh), si Pagobo niingon nga ang singil sa kuryente mahimong motaas sa 30 ngadto sa 50 porsiyento, bisan pa nga ang presyo mahimo pa nga mausab human ang mga miyembro sa board sa Meco maghisgot bahin niini.
Sa laing bahin, gisuportahan ni Cebu Governor Gwendolyn Garcia ang tinguha ug hangyo ni Lapu-Lapu City Mayor Junard Chan nga makalingkod isip sakop Mactan-Cebu International Airport Authority (MCIAA) Board.
Kini human si Chan uban ang iyang asawa nga si Kongresista Cynthia Chan sa lone district sa Lapu-Lapu niduaw sa buhatan ni Garcia kagahapon, Pebrero 1 aron ipahibawo sa gobernador ang ilang katuyoan.
Ang inahan sa lalawigan sa Sugbo nagkanayon nga makiangayon lang nga maapil sa mayor sa Lapu-Lapu sa MCIAA Board sanglit anaa sa iyang hurisdikyon ang tugpahanan. /