Usa ka barangay konsehal nga wanted sa kasong illegal gambling tungod sa tigbakay, napusasan alas 4 sa hapon sa Barangay Cotcoton, lungsod sa Dumanjug, lalawigan sa Sugbo.
Si Evaristo Betonga, Jr., minyo, konsehal sa nahisgutang barangay, napusasan human nalutsan og warrant of arrest sa kalapasan sa P.D.1602 o illegal gambling.
Si Police Corporal Geordan Victor Redido sa Ronda Police Station nga nahinabi sa Superbalita Cebu, nagkanayon nga ang warrant of arrest giisyu ni Judge Jose Belarmino sa Municipal Circuit Trial Court (MCTC) sa Dumanjug-Ronda nga gipitsahan og Enero 31, 2023.
Ang korte mihatag og katungod sa konsehal nga makapiyansa og P30,000 alang sa temporaryong kagawasan.
Matud ni Redido, si Bitonga, usa lang sa ilang napasakaan og kaso sa illegal gambling human gironda sa kapulisan ang tigbakayan sa Barangay Cansayahon, lungsod sa Ronda niadtong Nobiyembre 1, 2022.
Sumala ni Redido, nakadagan si Bitonga atol sa pagronda.(GPL)