Mius-os og katunga ang presyo sa kilo sa sibuyas bombay sa Metro Cebu karon bisan kon wa pa hingpit moabot sa Kabisay-an ang suplay sa mga imported nga sibuyas bombay nunot sa krisis niini sukad sa Pasko sa miaging tuig.
Si Assistant Secretary Salvador Diputado sa Department of Agriculture (DA) Visayas nagkanayon nga gamay ra ang imported nga sibuyas nga niabot sa Kabisay-an human 50 porsiyento pa lang usab ang niabot sa 21,000 metric tons (MT) gikan sa giangkat nga gitugot ni Presidente Ferdinand Marcos Jr.
Matud ni Diputado, ang prayoridad sa nangabot nga sibuyas gikan sa abroad mao ang Metro Manila.
Dugang niya nga nikunhod na ang presyo sa bombay apan wala pa kini mapareha sa presyo kaniadto nga kapin sa P100 ang kilo.
Bisan pa niini, ang presyo sa sibuyas sa Sugbo miubos karon.
Si Diputado nagkanayon nga ting-harvest karong panahona na sa mga mag-uuma sa sibuyas sa amihanang Luzon nga posibleng hinungdan sa pag-ubos sa presyo.
SIYUDAD SA SUGBO
Si Rosita Casipong, sakop sa Allied of Energetic Vendors Association Inc. (AEVAI), nagkanayon nga gikan sa P650 nga presyo niadtong Disyembre ug unang semana sa Enero, karon anaa na lang sa P320 ang kilo nga maoy ilang baligya didto sa Carbon.
Laing tinubdan ning mantalaan nga dili lang magpahingan nagkanayon nga sa Carbon Market, ang mga negusyante sa lamas maoy nagkontrolar sa presyo sa mga baligya, labi na sa bombay.
Gisaysay niya nga kon makapalit sila og 50 ka sako sa partikular nga presyo, apan sa sunod nilang pagbalik sa pareho nga adlaw, ang presyo mosaka na usab og P100 samtang, laing P100 na usab ang isaka sa presyo para sa laing kustomer hinungdan nga nisamot kamahal ang retail sa bombay.
Gusto sa mga komprador nga masusi sa mga awtoridad ang maong matang sa paagi sa pagpamaligya sa mga negusyante og bombay, kinsa iyang gihulagway nga nagtago sa daghang suplay sa lamas sa ilang bodega sa Barangay Ermita.
Bahin sa pag-us-os sa presyo, nagduda usab ang tinubdan nga tungod kini sa iyang gituohan nga nadayon ang pagpayuhot sa imported nga sibuyas bombay.
SIYUDAD SA LAPU-LAPU
Dunay pag-ubos sa presyo sa pula ug puti nga sibuyas sa Lapu-Lapu City Public Market.
Si Maria Elena Caballes, tagdumala sa merkado publiko sa dakbayan, nitug-an sa SunStar Cebu Miyerkules, Pebrero 1, 2023, nga adunay mga 50 porsiyento nga pag-ubos sa presyo sa pula ug puti nga sibuyas.
Namatikdan ni Caballes nga ang mga lokal nga red onion gibaligya na karon sa merkado sa kantidad nga P350 matag kilo kon itandi niadtong Disyembre sa miaging tuig nga nagkantidad og P650 matag kilo.
Gitataw usab sa market administrator nga ang puti nga sibuyas gibaligya na karon sa tag P300 matag kilo.
Matod niya mapalit ang puti nga sibuyas sa tag P600 matag kilo sa Disyembre hangtod nga hinayhinay kining nius-os ngadto sa P500 sa sayong bahin sa Enero ning tuiga.
SIYUDAD SA MANDAUE
Sa Mandaue City Public Market (MCPM), nius-os og labing menos P300.
Si Cesar Mercadal, officer-in-charge ug market supervisor sa MCPM, nitug-an sa SunStar Cebu sa Miyerkules, Pebrero 1, 2023, nga ang pagkunhod naobserbahan sa katapusang duha ka mga semana sa Enero.
Matud ni Mercadal nga ang mga sibuyas gibaligya na karon sa P320 ngadto sa P340 matag kilo samtang ang puti nga sibuyas kay P200 ngadto sa P300 matag kilo, minus og 50 porsiyento gikan sa tag P700 matag kilo niadtong Disyembre.
Sa Mandaue, si Mercadal niingon nga nisaka ang presyo sa sibuyas niadtong miaging holiday season, diin ang puti ug pula nisaka ngadto sa P750 matag kilo.
Ang MCPM adunay dul-an sa 700 ka mga palaliton nga stalls, diin mga 115 ang mga seksyon sa utanon.
Lakip sa ilang mga interbensyon, matod niya, aron makatabang sa pag-regulate sa presyo sa sibuyas mao ang pagsiguro nga ang ilang suppliers accredited ug rehistrado ug mohimo sa matag adlaw nga pagmonitor sa presyo pinaagi sa ilang price monitoring board.
Si Diputado nipasabot nga normal nga pagmahal sa sibuyas bombay matag Pasko apan wala magtuo nga ingon niadto kataas ang umento. (PAC, MKG, HIC)