Labnihon og suway sa San Miguel Beermen ang ilang ikatulong sunodsunod nga kadaugan sa samang gidaghanon nga mga duwa sa ilang pagpakigbatok sa Terrafirma Dyip sa premirong duwa nga sugdan karong alas 3:00 sa hapon, Pebrero 3, 2023, sa Philippine Basketball Association (PBA) Governor’s Cup sa Ynares Center sa Antipolo City.

Gisugdan sa Beermen ang ilang kampanya sa season-ending conference pinaagi sa pagmakmak sa Phoenix Super LPG Fuel Masters, 114-93, niadtong Enero 29, 2023 unya gisundan dayon kini nila og laing dakong kadaugan batok sa Blackwater Bossing, 105-86, niadto lang Pebrero 1.

Ang import sa Beermen nga si Cameron Clark igo lang nag-average og 21.5 puntos apan kon buot hunahunaon, dili na kaayo siya sa tantong mahago sa opensa gumikan kay abunda niini ang puwersa sa Beermen.

Naa sila si CJ Perez, Cam Clark, June Mar Fajardo, Marcio Lassiter, Simon Eneciso, ug Jericho Cruz nga pulos adunay katakos sa opensa.

Dili ikalimod nga taas ang moral sa Beermen apan dili sab magpabitin ang Dyip, nga gikan sa makapakaging nga kadaugan batok sa Meralco Bolts, 96-88, sa pagpangulo sa ilang makapaukyab nga import nga si Jordan Williams.

Sa 1-1 nga rekord sa Dyip, si Williams nag-average og 37.5 puntos samtang ang lokal nga pambato sa team nga si Juami Tiongson nag-average og 24 puntos.

“I have Jordan, I have Juami, I have everything so siguro sa bawa’t game dito makaka-tsamba kami,” matod ni Terrafirma coach Johndel Cardel.

Sa main game, magsangka ang TNT Tropang Giga ug Magnolia Chicken Timplados Hotshots. Ang Tropang Giga adunay 2-1 nga rekord samtang ang Hotshots adunay 0-1 nga baraha.