Dako og natampo kining kapihan sa nagkalainlaing mall sa pagtuki sa nagkalainlaing isyu sa atong nasud. Ang mga suki sa mga kapihan magsugod sa pagsuyop sa ilang paboritong kape inig-abli gyud sa mall sa alas-10 sa buntag, moundang sa tingpaniudto ug mobalik sa pangpangape hangtud na sa kahapunon usa sila manihapon.
Ang nakanindot sa maong panagpundok sa mga suki sa kapihan nga nag-apil sa mga huwes, piskal, abogado, pulitiko, mediamen, negusyante, taga-akademiya, balikbayan ug mga yanong magbubuhis nga kadaghanan senior citizen- mao ang ilang mga hunahuna ug komentaryo sa nagkalainlaing isyu nga giatubang sa siyudad, nasud ug sa tibuok kalibutan.
Dinhi nimo mabati ang mga seryuso ug lawom nga analysis sa mga panghitabo sa atong palibut. Dili sab hinuon kalikayan nga moguwa gyud kining mga hinanggaw nga pag-ayag sa nga isyu.
Samtang usahay motaas ang tingog sa managlahi nga opinyon apan dili kini mosangput sa away.
Ang inilang mga suki sa kapihan mao ang anaa sa upper ug lower ground sa SM City, Ayala Center ug Parkmall. Mga suod kining managhigala nga nagkapundok niining upat ka mga lugar. Matag grupo maghiusa gyud pagsaulog sa adlaw nga natawhan sa ilang kauban ug sa Pasko ug Bag-ong Tuig. Kadaghanan sa panag-ipon ipaagi sa amotay aron dili mabug-atan ang hingtungdan.
Akong giisip kining panagpundok sa mga tawo nga adunay ikatampo nga mga hunahuna alang sa atong siyudad ug sa tibuok nasud nga angayapalambuon. Mas maayo kini kon itandi niining kanunay lang gyud nga pagpanaway nga ibalandra dayon sa social media. (mannyrabacal1144@gmail.com)