Kapin sa P120 milyunes nga balor sa shabu nga motimbang og 17 kapin ka kilos ang napakgang sa Bureau of Customs (BOC) ug Philippine Drug Enforcement (PDEA)-7 sa Terminal 2 sa Mactan Cebu International Airport (MCIA) sa dakbayan sa Lapu-Lapu, pasado alas 7:00 sa gabii sa Miyerkules, Pebrero 1, 2023.
Nasikop ang suspek nga usa ka South African national nga giilang si Pietro Aliquo, kinsa sakay sa usa ka commercial flight gikan sa abroad nga niabot sa Terminal 2 sa MCIA sa naasoy nga adlaw.
Sa iyang biyahe, niagi una siya sa Doha, Qatar gikan sa South Africa una sa iyang destinasyon sa Sugbo.
Sa iyang pag-abot, niagi siya sa standard operating procedure (SOP) sa airport diin ang tanang mga bagahe sa mga pasahero gikan sa abroad kinahanglan nga moagi sa x-ray machine una makagawas.
Ang luggage ni Aliquo nga giagi sa x-ray machine gikahibudngan sa on-duty personnel sa BOC tungod sa kagrabe sa pagputos sa plastic hinungdan nga gibalik kini sa pagpaagi.
Ang BOC personnel nga nagduda sa bagahe nangayo og tabang sa mga sakop sa Philippine Drug Enforcement Agency (PDEA 7) K-9 Unit aron masuta kon unsay sulod sa bagahe.
Ang K-9 dog nga si ‘Bulik’, atol sa pagpasimhot niini, walay langan nilingkod tungod sa bagahe timaan nga kini ilegal nga drugas.
Si Aliquo gitanggong una samtang gisusi ang iyang bagahe dayon gipusasan sa dihang nakompirmar nga kontrabando ang iyang dala.
Samtang, si Lapu-lapu City Mayor Junard “Ahong” Chan nagpasalamat sa pagkapakgang sa drugas gikan sa South Africa.
Matud pa niya nga dakong problema kon ugaling nakalusot pa ang drugas.
Dugang ni Chan nga ilang nahibaloan nga si Aliquo naka-book na og hotel nga anaa ra usab sa Lapu-Lapu City.
Dason ni Chan nga kon nagmalampuson pa ang pagdala sa kontrabando paingon sa hotel ug mahiadto sa mobaligya, lisod nang gukdon.
Gipahibawo ni Chan nga ang maong kontrabando dili unang higayon human nga dunay usa ka babayeng Kenyan national nga nisuway usab og palusot og illegal drugs niadtong Septiyembre 2011 apan napakgang gihapon.
Ang mao nga langyaw niagi usab sa Doha, Qatar sa wa pa nilupad dinhi sa Sugbo.
“Dili gyud sila magmalampuson kay nakaalerto man kanunay ang atong mga law enforcement agency nga nagbantay sa atong airport,” matud sa mayor.
Si Aliquo nagkanayon nga mao kini ang unang higayon nga iyang gihimo ug wala gani siyay kasayuran unsay iyang dala.
Matud niya nga duna siyay higala nga nipadala kaniya sa maong malita apan wala siya nasayod unsay sulod.
Dugang ni Aliquo nga kon iya kining nadala sa gi-book nga hotel, ang iyang higala mopahibawo kaniya kon kuhaon na sa usa ka tawo ang maong malita dinhi sa Sugbo apan wala siya kaila.
Si Aliquo pasakaan og kasong kalapasan sa Republic Act 9165 kun Comprehensive Dangerous Drugs Act of 2002. /