GIBUTYAG sa Davao City Disaster Risk Reduction and Management Office (CDRRMO) nga walay natala nga dagkong kadaut sa imprastraktura, pagkalas sa kinabuhi ug pagkaangol human sa inisyal nga assessment sa intensity-three nga linog nga nabati sa mga residente sa Davao niadtong Miyerkules sa gabii, Pebrero 2, 2023.
Kini suma ni CDRRMO Head Alfredo Baloran atol sa pakighinabi sa Davao City Disaster Radio kagahapon, Huwebes, Pebrero 2, 2023, diin nagkanayon ang opisyal nga ang risk assessment team ug structural engineers gikan sa City Engineer's Office nagpahigayon og assessment sa City Hall of Davao ug sa Sangguniang Panlungsod.
"Wala ma'y major damage, the buildings are suitable for occupancy," ingon sa opisyal.
Matud niya nga sunod nga i-assess mao ang mga minor hairline cracks nga gitaho sa Jacinto Health Center ug Mintal Elementary School, nga temporaryong gisuspende ang occupancy sa usa sa mga building niini nga nakaangkon og liki.
Gitambagan usab ang publiko nga di una agian ang Matina Crossing Overpass diin temporaryo kini nga gisirad-an sa barangay tungod sa dugang liki nga namatikdan diin ang CEO mipasalig na nga unahon ang assessment alang sa overpass.
Dugang pa, gibana-bana nga 10 ka mga estudyante, pito gikan sa Daniel R. Aguinaldo Elementary School ug tulo ka mga pasyente gikan sa Holy Cross of Calinan ang gikataho nga nakuyapan tungod sa linog.
Matud pa ni Baloran nga naulian dayon sa panimuot ang maong mga tinun-an ug gipakuha sa ilang mga ginikanan niadtong Miyerkules sa gabii.
Ang hepe sa CDRRMO nagkanayon nga bisan pa sa maong mga taho, mapasalamaton siya nga dili dako ang kadaut sa imprastraktura nga hatud sa maong linog.
"So far magpasalamat ta sa Ginoo kay wala gyud ta'y major infra damage, wala pud ta'y loss of life or injury due to the shaking," niya pa.
Kabahin sa disaster management sa mga tunghaan, si Baloran niingon nga kadtong adunay upat ka andana o labaw pa kinahanglang magsegurado nga ang mga tinun-an luwas pinaagi sa mga butang nga ilang mahinumdoman panahon sa linog, sama pananglit sa luwas nga agianan.
Kinahanglan sab nga magpabiling kalmado ug dili angayan nga mag-panic tungod kay mahimo usab nga mosangpot kini sa kalisang sa mga estudyante.
Si Baloran niingon nga angay sab nga tagdon ang kaluwasan sa mga tinun-an nga posibleng magtapok duol sa kadalanan human sa linog.
Matud niya nga gikinahanglan ang re-orientation sa disaster risk reduction and management ngadto sa mga magtutudlo, ilabina sa mga bag-ong na-hire.
Samtang, ang maong re-orientation usa lamang ka dugang nga panginahanglan tungod kay ang Department of Education naka-institutionalize na sa disaster risk reduction and management measures niini.
"Gina-practice gyud sa DepEd during ground shaking nga dapat safe gyud ang estudyante. Kung naay mga ground-shaking, especially earthquake 6.1 epicenter, last Wednesday night, expect gyud ta nga naay mga after shocks kung naay paglihok sa yuta, ground shaking, dili lang gyud ta magpanic and always gyud tan-awon nato atong safety," pahinumdom sa opisyal.