Wa kapurol tungod sa M6.1 linog

Hulagway iya sa Wikipedia
Hulagway iya sa Wikipedia

NABULILYASO ang pagpangasilyas sa usa ka mister gumikan sa nahitabong linog sa Compostela alas 6:44 sa gabii, Miyerkules, Pebrero 1, 2022.

Gisulti sa mister nga nagpatago sa pangalang Porto, 43, nga taga Poblacion, Compostela nga niadtong higayona tua siya sulod sa balay samtang nagtan-aw og salida sa telebisyon ug nagbantay sa tulo ka tuig niyang anak sanglit ang iyang asawa nagluto sa ilang panihapon.

Matud pa nga gumikan sa tawhanong panginahanglan, gibiyaan makadiyot sa bana ang anak nga nagdula-dula sa sala ug nagdaling misulod sa kasilyas nga naa lang sab sa ilang balay.

Apan samtang nag-utong-utong sa sulod sa kasilyas nga naglingkod sa inidoro, kalit og tay-og ang kusog nga linog sanglit haduol ang lungsod sa sentro sa linog nga mao ang lungsod sa New Bataan.

Tungod sa kahadlok sa bata, mitiyabaw kini hinungdan nga dali sab nga migawas si Porto sa kasilyas nga wa makahuman sa iyang tuyo ug nalimot sa pagsuot og balik sa gihushos nga purol.

Gialsa ang anak ug midagan pagawas sa duha ka andana nga balay dayong gisugat sa asawa nga labihan ang kabalaka.

Apan ang kabalaka, nahulipan og katawa dihang nakita ang itsura sa mister nga way purol ug nanimaho pang ebak.

Wa'y nasamdan sa pamilya apan pipila ka mga gamit sulod sa balay nangabuak ug ang selpon nga gigamit ni Porto sulod sa kasilyas nahagbong sa inidoro human nga iyang nabuhian gumikan sa pagdinali-dali.

Sa paghagpat ning maong balita, wa pa masuta ang kinatibuk-ang damyos sa linog hinuon ang agobernador sa probinsiya sa Davao de Oro nagpagawas og mando nga ikansela ang tanang trabaho ug klase, Huwebes, Enero 2, 2023, alang sa pagahimuong pagsusi sa mga establisemento ug mga eskuwelahan labi na sa lungsod sa New Bataan nga gitay-og og magnitude 6.1 nga linog.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph