Nakakita pagbalik og kahayag ang boxing career ni kanhi world champion Johnriel “Quadro Alas” Casimero human siya nipirma og kontrata sa usa ka Japanese promoter.
Ang Treasure Boxing Promotion nga gipangulohan ni Masayuki Ito nakigkita ni Casimero kagahapon, Pebrero 3, 2023, dinhi sa Dakbayan sa Sugbo aron ihan-ay ug himuong pinal ang ilang panagsabot.
Si Ito, kinsa kanhi world champion una kini nahimong promoter, nipadayag sa pipila ka mga sakop sa Cebu boxing media kon nganong nakadesisyon sila sa pagkuha kang Casimero.
Pinaagi sa usa ka interpreter, gipasabot ni Ito nga gusto nilang agakon pagbalik sa taas ang karera ni Casimero hilabi na kay ilado kini sa Japan.
Sa miaging pipila ka mga tuig, ubay-ubay sab nga mga kahasol ang naagian sa boxing career sa lumad nga taga Ormoc City lakip na niini ang desisyon sa World Boxing Organization (WBO) nga tangtangan siya sa iyang WBO bantamweight title.
Nagkanayon si Ito nga daghan sila og plano alang ni Casimero hangtod nga matuman ang pangandoy niining ikaharong si kanhi bantamweight undisputed champion Japanese “Naoya” Inoue, kinsa nagkampanya na karon sa super bantamweight division.
Hinuon giklaro ni Ito nga ubos sa ilang pagdumala, pabalikon una nila og away si Casimero sa bantamweight aron harungon ang dekalidad nga mga boksidor sa maong timbang sama ni Nonito “Filipino Flash” Donaire ug Australian Jason Moloney.
Naa sab sa radar sa TBP alang ni Casimero mao ang super bantamweight fighters nga sila si Mexican Luis Nery ug American Ra’eese Aleem.
“Nagpasalamat ko nga maka-guide sila nako aron mahatagan ko og big fights,” matod sa 33 anyos nga Casimero, kinsa adunay 32-4, 22KOs nga rekord.
Gipasabot ni Casimero nga bisan kinsa, andam siyang moaway apan iyang gitataw mao gyud ang naa sa ilang plano nga kontrahon.
“Depende lang kon unsa ang mas nindot nga away para nako. Tan-awon nato,” matod ni Casimero.
“Basta ako na man sila gisultihan nga gusto gyud nako nga makontra si Inoue.”
Sa inisyal nga plano, nagtinguha ang TBP nga sagubangon ni Casimero ang labing una niining away ubos sa ilang pagdumala karong Mayo o Hunyo, 2023, posible sa Pilipinas.
Kon sa Pilipinas, naghandom si Casimero nga mapahigayon ang labing una niyang away ubos sa TBP sa Ormoc.
“Siyempre gusto nako sa Ormoc para sa akong mga silingan didto. Pero andam ko moaway bisan asa. Puwede sa Japan, puwede sa Pilipinas, puwede sa US,” dugang ni Casimero.