Dili na maihap ang mga istorya sa relasyon tali sa iro ug tawo. Bahin sa pagka maunungon, mahigalaon, way kondisyon nga molaban, tigbantay sa seguridad, ug kasaligang kauban.
May binuhi ka ba nga iro? Segurado nga duna kay imong kaugalingon nga istorya.
Si Frederick the Great sa Prussia (1712-1786) sa Uropa maoy gihatagan og kridito nga unang nigamit sa linya nga “man’s best friend” diin naghulagway sa kasuod sa mga iro ngadto sa tawo.
Sa Pilipinas, ang Republic Act (RA) 8485 o The Animal Welfare Act of 1998 namugna sa pagseguro sa pagpanalipod ug pagpalambo alang sa kaayuhan sa tanang kahayupan, dili lang sa mga iro ug iring.
Apan sukwahi ang nahitabo sa mga iro sud sa subdivion sa Casa Mira South (CMS) sa Barangay Inuboran, dakbayan sa Naga. Gipanghiloan.Nangalisbo ang baho sa mga iro nga nangamatay.
Nagpadayon ang imbestigasyon sa kapulisan sa Naga kabahin sa gituohang halapad nga pagpanghilo sa mga iro ug gilauman nga dunay makuha nga CCTV camera footage sulod sa subdivision sa pagtumbok sa malapason.
Ang kapunongan sa mga residente sa subdivision niluwat na og pamahayag nga sila wala makauyon sa linuog nga pagpatay sa mga iro.
“The recent incidents of dog poisoning in the premises of our subdivision are alarming. The CMS HO does not and will never support nor condone inhumane methods to control the stray dog population in the community,” tipik sa pamahayag sa Casa Mira South Homeowners Association nga nigawas sa mga mantalaan.
Kinsa ang nagpatay sa mga iro?
Si Police Lieutenant Colonel Junnel Caadlawon, hepe sa Naga City Police Station, gikutlo sa mga taho nga nagpabiling tanghaga sa pagkakaron human wala pay matumbok nga responsable.
Karong adlawa, Pebrero 4, 2023, ang kapulisan ug homeowners gikatakda nga molusad og clean-up drive aron pagkuha sa nangamatay nga mga iro.
Inosente ang mga iro. Way igong salabotan katumbas sa tawo apan way kondisyon nga mosukli sa pagmahal sa iyang agalon.
Ang responsable sa pagpatay sa mga iro mas minos pa og pangutok sa labing ubos nga hayop.
Kinahanglang masikop ug masilutan sa iyang linuog nga binuhatan.