Dear Noy Kulas,
Itago lang ko sa ngalan nga Taurus. Usa ko ka engineer nga nakabase diri sa Saudi Arabia. Ang akong suliran mahitungod sa akong pares. Naa na mi duha ka mga anak, 10 ug 8 years old. Di pa mi kasado.
Mag 8 years na ko naa diri sa Saudi. Ang akong partner sa uyab pa mi medyo barkadistaa unya mahilig pud og nightlife. Nagka grabe na iyang pagka laagan ug naa nay daghang mga issue nga naa daw laing lalaki. Eight years na ko sa panarbaho diri sa layo, wala naka save og kwarta, pirme pa gani kulang. Mga two years ago naay nahitabo nga nisumbong iyang mga relatives nako nga nasakpan nila nga naay lalaki sa among balay pero ako gihapon siyang gipasaylo tungod sa among mga anak.
Karon lately lang, naa na pud na issue nga kana lagi daw kaadlawon na makauli gikan naglaag, naay laing lalaki nga nag drive sa sakyanan namo.
Mahal kaayu nako ni nako akong partner, labaw na ang among duha ka mga anak. Apan karon naglibog na ko og unsay akong tuohan kay ako siyang giestoryahan kabahin ani, dili daw tinuod. Tambagi ko, Noy Kulas, kon unsay angay nakong buhaton. Dinhi na lang ko kutob ug daghang salamat
TAURUS
Taurus,
Duna ra bay giingon nga kon dunay aso, dunay kayo. Tinuod man o di, di sab maayo nang iyang gibuhat nga magsige og laag bisan hangtod sa kaadlawon kay sama na baya mo og tinud-anay nga magtiayon bisan di pa mo kasado. Di usab na maayo nga image sa usa ka inahan nga maglaagan gihapon bisan naa nay duha ka mga anak nga gagmay pa uban sa mga barkada. Dapat iya nang atimanon og tarong.
Naa pay lain nga wa siyay natigom sa imong tinrabahoan. Nag save unta siya aron kon duna na moy igong pundo, moundang na ka ug magnegusyo aron naa na kay time uban nila. Unya magpakasal na unta mo. Apan ning imong nadungog ug batasan, angay ka sab nga magduha-duha sa pagpakasal niya.
Ang maayo nimong buhaton mao ang pag hire og private detective o tawo nga dunay kapabilidad sa pagpaniid niya. Magkuha og pics sa iyang mga laag aron duna kay proof nga tinuod ang mga estorya. Kon duna na gani, diha ka na mohukom, pakaslan mo ba siya o di. Ayaw lang sa paghukom hangtod nga ikaw na mismo ang dunay pruyba ug nga di hungihong ang tanan.
NOY KULAS
rojval69@yahoo.com