DALI kaayo tang makalitok sa pulong nga “way batasan” kon naa tay makita o madungog nga sukwahi sa atong pagtuo ug binuhatan.
Apan sa tinuod lang, kita tanan dunay batasan nga wa lang ta ka uyon sa uban.
Diay akong mga kinuykuyang ‘social rules’ nga magpakita og maayong pamatasan.
Kon naa kay tawagan sa telepuno unya di dayon ka matubag, ayaw balikbaliki og tawag kay makairita kini labi na kon ang imong gitawgan busy, naay importanting gibuhat o naa sa meeting unya di mahimong madisturbo. Hinuon, pagbilin og text o voice mail sa imong tuyo.
Pagmatngon og kaikog kon naay mangimbitar og kaon. Ayaw intawon patugatuga og order og mahalong pagkaon kon di ikaw ang mobayad.
Bayri imong utang. Ayaw huwata nga singilon ka sa imong gihuwaman. I-uli sab ang butang nga imong hinuwaman bisag unsa kini ka gamay o barato sama sa paying, ballpen o bawnanan. Ining pa-agiha mas taas ang puruhan nga pahuwamon ka pag-usab sa sunod.
Kon bayran ang imong plete sa imong higala, paninguhaa nga ikaw na sab ang mo plete niya sa sunod ninyong sakay kay wa nay libre rong panahuna.
Ayaw panapaw og naay magkukabildo. Pahumana una siya og paguwa sa iyang isulti o huna-huna una ka mo sabat o mopuno sa imong punto.
Ayaw sab ihikaw ang paghatag og pasalamat bisag unsa ka gamay sa nabuhat, natabang o nahimo nimo.
Ayaw pilia kon kinsa imong respituhan. Angay nga patas ang paghatag o pagtimbaya ma manager o janitor man.
Pagkat-on og respito sa huna-huna ug punto sa uban. Ayaw pagbuot. Ayaw sab pag-insister sa imong pulong ug huna-huna kay dili sa tanang panahon insakto ka.
Hinay-hinay sa pagpanaway. Hinuon dayga kon unsay nindot. Ayaw sab ihikaw ang imong mga maanindot nga pagdayeg.
Ayaw interbiyuha o pangutan-a imong higala o kauban, nga gikan sa doctor, sa iyang sakit kay personal kini gawas kon siya mismo ang boluntaryong mosugilon. Panghinaot hinuon nga siya ok ra og maayo og dali.
Ayaw sab pagtuga-tuga og hatag og tambag kon wa kini pangayo-a.