Ang Traffic Enforcement Agency of Mandaue (Team) nihimo og surprise checkpoints sa mga karsada aron masusi ang mga malapasong motorista nga nagmaneho nga walay lisensya ug vehicular registration.

Si Edwin Jumao-as, hepe sa Team, nagkanayon nga tumong sa operasyon mao ang pagkapakgang sa carnapping ug pagminus sa traffic violators sa dakbayan.

Ang inisyatiba nga gitawag og “one-stop motor shop” nagsugod niadtong Nobiyembre sa miaging tuig, diin ang mga motorsiklo sa masalaypon nga mga drayber i-impound ug temporaryo nga gikustodiya sa Team.

Si Jumao-as niingon nga dili mominus napulo ka mga motorsiklo ang ilang nasakmit matag adlaw sukad sa pagpatuman niini.

Matud niya nga kasagarang mga kalapasan nga ilang natala mao ang mga drayber nga nagmaneho walay lisensya ug rehistro o expired nga lisensya ug rehistrasyon.

Si Jumao-as niingon nga random inspection ang ipahigayon matag adlaw nga adunay mga personahe gikan sa Mandaue City Police Unit (MCPU), Drug Enforcement Unit (DEU), Highway Patrol Group (HPG), Anti Terrorist Unit (ATU), Land Transportation Office (LTO), ug Team.

Matud niya, ang checkpoints dungan nga ipahigayon sa lainlaing mga lugar sa Mandaue City, ilabi na sa mga boundary passage niini.