Namatay ang usa ka pintor human nabangga ang iyang motorsiklo kay na overshoot sa iyang pagkurbada alas 2:00 sa hapon sa Biyernes, Pebrero 3, sa national highway sa Brgy. Guiwanon, lungsod sa Barili, Sugbo.

Ang biktima giilang si Ricardo Romedio Elegino, 57, minyo, taga Brgy. Taytay, lungsod sa Badian.

Si Police Master Sgt. Pablito Caadlawon sa Barili Police Station nga nahinabi sa Superbalita Cebu nagkanayon nga si Elegino gikan sa ilang balay sa Badian sakay sa iyang Honda TMX 155cc padulong sa dakbayan sa Sugbo.

Ang biktima gadali, kusog kaayong nakapadagan sa motorsiklo apan pag-abot sa kurbada, siya na overshoot ug nibangga sa Small Town Lottery (STL) booth.

Sa kakusog sa impact, ang biktima nakaangkon og grabing kadaot sa ulo ingon man sa kalawasan.

Gani, siya ug ang motorsiklo nahagbong sa kanal.

Sumala pa ni Caadlawon nga ang kabanay nibutyag nga nagdali ang biktima paingon sa dakbayan sa Sugbo kay dunay gikontratang pakyawon sa pagpintal.

“Gitagoan daw ang yawe, kay dili mosugot (ang misis) nga magmotorsiklo kay delikado. Unya nakakuha man diay ni siyag duplicate,” dugang ni Caadlawon.

Gipadayag ni Caadlawon nga accident prone ang maong bahin sa karsada.

Dangog ang karsada atol sa hitabo kay nag-uwan. (GPL)