Tulo ka mga menor de edad gikataho nga nasakpan nga nagsuyop og shabu sa Huwebes sa gabii, Pebrero 2, 2023 sa usa ka kubol sa Sitio Mahayahay, Barangay Apas, Siyudad sa Sugbo.
Nabulabog ang giingong pagsuyop sa tulo dihang naabtan sila sa nag roving nga si Brgy. Kapitan Virgil Cabigon ug mga barangay tanod.
Ang tulo nabulabog dihang ang ikaupat nilang kauban nga babaye nga anaa sa silong sa kubol naabtan nila ni Cabigon ug mga tanod tungod kay iyang gipatawag.
Nitug-an ang maong babaye nga duna pa siyay mga kauban sa taas hinungdan nga gisaka sa mga tanod ug didto nadiskobrehan.
Matud ni Cabigon nga ang usa sa tulo nga nasakpan nagsuyop miangkon nga siya ang lider sa gang nga “Crips” sa Barangay Apas.
Ang tulo kasamtangang gitugyan sa GAD sa barangay human giproseso sa Mabolo Police Station ang nakuhang mga ebidensiya aron sila ma-turnover ngadto sa Second Chance Rehabilitation Center.
Samtang si Cabigon nasagmuyo sa nasaksihang pag suyop sa tulo ka mga menor de edad sulod sa giabandonar nga kubol.
“Nakurat ta oi labi na ang usa ani anaa pa sa Juvenile (facility) mao na nga ako siyang giingnan nga naunsa man ka, Dong? Abi ko ba nagbag-o na ka tapos ikaw pa ang nag lider-lider ani,” matud ni Cabigon.
Ipatawag sa barangay official ang mga ginikanan sa tulo ka mga menor de edad.