Human sa iyang mabayanihong pagtabang sa ginang, kinsang liog gilaslas, ang tinun-an sa kursong Nursing bahaan sa mga pasidungog nga naghuwat kaniya.
Gawas sa pasidungog nga ihatag sa University of Cebu (UC) sa ilang tinun-an, kinsang video nag viral sa social media tungod sa iyang pagtabang sa usa ka ginang, hatagan usab siya og full scholarship sa tunghaan.
Matud ni Mercy Milagros Apuhin, dean sa College of Nursing sa UC Banilad, nga sa Lunes, Pebrero 6, 2023, dalhon niya sa buhatan sa ilang university president nga si Attorney Augusto Go si Angyl Fayth Ababat aron hatagan og full scholarship sa tunghaan.
Ila usab nga iendorso sa buhatan ni Go ang classmate ni Angyl Fayth nga si Kristianne Joice Noelle Ona nga maoy niabag sa paghatag sa mga gamit aron masap-ungan ang samad sa liog ni Bernadeta Zamora ug mahunong ang pagdugo.
Dili lang ang paghatag sa scholarship ang himuon sa kadagkoan sa tunghaan, sila na usab ang moabaga sa gasto sa board ug international exams.
“During our capping ceremony mao man ni ang importante nga event sa Nursing which will happen on February 21, 2023 sa Waterfront. Amo pud ni nga i-recognize with her parents, naa siyay award. Nya ang among review center which is Power House Review Center, she will be given scholarship, the national and international board exam, will be free,” matud ni Apuhin.
Ang Philippine Nurses Association (PNA) nagtinguha usab nga hatagan og pasidungog si Ababat uban sa Association of Deans of Philippine Colleges of Nursing Inc.- Cebu.
Dakong garbo sa tunghaan ang gihimo sa ilang tinun-an nga tungod niini angay lang nga panggaon nila pinaagi sa paghatag sa tanang pasidungog.
NGANONG DIDTO
Gibutyag ni Ababat nga niadto sila sa usa ka medical store nga naa nahimutang sa Luym building uban sa iyang mga classmate aron mamalit og medical materials sanglit kompleto, matud pa, ang maong tindahan ug makabarato pa sila.
Apan kalit lang nagubot ang mga tawo, nga sa una niyang pagtuo, dunay nabiktima sa pagpanglabni.
Sa dihang nakita niya nga nagkadugo na ang hamtong nga babaye, nakurat siya ug wala dayon makalihok sanglit duna may daghang mga tawo nga maguwang pa niya og pangidaron nga sa iyang pagtuo maoy unang motabang sa biktima.
Tungod kay walay nakaako sa pagduol sa samaran nga si Bernadeta, niduol siya aron hatagan og first aid pinaagi sa pagsampong sa samad sa liog.
Si Ona ang makita sa CCTV nga naka PE uniform nga niabag kang Ababat ug maoy nikuha og gauze pad aron mahunong ang pag-agas sa dugo.
“I saw Nanay trying to stop the bleeding from her hands. I was truly shocked with the incident and I was hesitant at first since there’s a lot of other adult and students of whom I was expecting to help first. But nobody came so I hurriedly rushed over,” matud ni Ababat.
Iyang giklaro nga bisan nga naa pa sila sa ikaduhang ang-ang sa kolehiyo, apan gitudloan na sila sa tunghaan unsaon paghatag og first aid kon dunay disgrasya nga mahitabo.
Bisan kon naa pa sa second year si Ababat, matud ni Apuhin, nga gipakita na niini ang kalidad sa pagka nurse diin natisok na sa dughan ang pag-amuma ug kaluoy sa mga tawo nga angay nga tabangan.
Si Ababat lumad nga taga Baybay City, Leyte, kamanghuran sa duha ka mga magsuon.
Ang iyang maguwang nga lalaki usa ka seaman samtang ang iyang inahan magtutudlo ug ang iyang amahan negusyante.
LUWAS NA
Naa na sa luwas nga kahimtang si Bernadeta, matud ni Police Lieutenant Colonel Janette Rafter, deputy city director for operations sa Cebu City Police Office.
Matud niya nga sumala sa pamilya nga makalihok na ang biktima.
Si Zamora nakaangkon og lawom nga samad sa liog human gikalitan sa pag-abis sa suspek nga si Edwin Lumacad samtang naninda ang biktima sa iyang mangga.
Si Lumacad nga kapuyo ni Bernadeta niangkong nagselos sa usa ka lalaki.
Matud niya nga nakabantay siya sa iyang kapuyo ug sa lalaking tigbaligya og tubig nga magsinyasay kanunay.
Iya sab nga gibauran ang biktima sa di pagtutok og gwapo nga lalaki.
Matud niya wa siyay tuyo sa pagpatay kang Bernadeta.
Tungod sa kalawom sa samad sa liog, gipaubos ang biktima sa operasyon sa mga doktor.
“So far sa coordination sa atong station commander Police Major Henry Orbiso with the family, giobserbaran pa ang pasyante. Eventually naa na ni karon sa stable condition but as of now giingnan sila nga makalihok na gamay,” matud ni Rafter.
Sa miaging adlaw, gipasaka na ang kasong frustrated murder in relation to RA 9262 kun Violence Against Women and Children (VAWC) batok kang Lumacad.