Hatagan sa Philippine Red Cross og mga balay nga kapasilungan ang 60 ka mga pamilya sa lungsod sa Alegria, Sugbo nga maoy usa sa mga lungsod nga labihang naapektuhan sa Bagyong Odette niadtong Disyembre 2021.

Ang sakop sa Red Cross niduaw sa buhatan ni Cebu Governor Gwendolyn Garcia aron ipahibawo ang ilang tinguha alang sa naasoyng lungsod.

Si Atty. Maria Vera De Jesus, Philippine Red Cross-Cebu Chapter Administrator, nagkanayon nga duna na silay na identify nga beneficiaries alang sa libreng pabahay.

Gidugang niya nga duna na’y luna nga nasusi ang Kagamhanan sa Lungsod nga mahimong kapahilunaan sa mga benepisyaryo.

Subay sa plano, ang LGU maoy mopalit sa luna samtang ang Red Cross maoy mopundo alang sa pagtukod sa mga balay.

“Sa ngayon po ay nasa coordination phase pa lang po tayo. Kasi kailangan maayos lahat bago tayo magsimula. Sana po mas mabilis kaysa sa inaasahan mahirap kasi magsalita kung ilang buwan baka masyado nating mapaasa ang mga tao. We really wanted a quality shelter for them,” matud ni De Jesus pinaagi sa Sugbo News.

Subay niini, si Garcia nagplano usab nga tabangan ang mga residente sa lugar aron may kuhaan kini sa ilang panginabuhian. / ANV