Nangawat sa tabon sa manhole nailhan sa pulis

File photo
File photo

Nailhan na ang lalaki nga nakuha sa closed-circuit television (CCTV) camera nga nangawat og puthaw nga tabon sa manhole sa Barangay Bakilid, dakbayan sa Mandaue niadtong Enero 24, 2023.

Si Major Romeo Caacoy Jr., hepe sa Subangdaku Police Station, niingon sa Sabado, Pebrero 4, nga ila nang gisumiter ang ngalan sa suspek ngadto sa City Government alang sa pagpasaka og kaso.

Matud niya nga ilang gipugngan ang ngalan sa suspek hangtod nga mapasaka ang kaso batok kaniya. Matud niya nga posibleng pasakaan og kasong theft ang suspek.

Matud ni Caacoy nga wala pa nila ma-recover ang puthaw nga tabon sa manhole.

Mga ala 1 sa kaadlawon niadtong Enero 24, nakuha sa CCTV camera ang usa ka lalaki nga nangawat og puthaw nga tabon sa manhole sa Dalan L. Jayme sa Barangay Bakilid.

Sa sinugdan, nagpakaaron-ingnon siya nga nangihi samtang iyang gisusi kon duna bay tawo sa palibot. Giablihan niyag gamay ang manhole. Mibiya siya ug mibalik paglabay sa lima ka minuto, nagpakaaron-ingnon na usab nga nangihi. Dayon iyang gibutang ang tabon sa manhole sa lingkuranan sa iyang motorsiklo ug nipadagan.

Si Caacoy niingon nga ilang nailhan ang suspek pinaagi sa pakig-alayon sa ubang police stations sa dakbayan.

Base sa ilang inisyal nga imbestigasyon, matud niya nga posibleng sakop ang suspek sa grupo nga mangawat og mga kabtangan sa gobyerno.

Ang Subangdaku Police Station maoy responsable sa pagmintinar sa kalinaw ug seguridad sa Barangay Bakilid, Tipolo ug Subangdaku.

Si Caacoy niingon nga mohimo sila og imbentaryo sa mga propriedad sa gobyerno sa ilang hurisdiksyon aron masuta kon kon duna bay gikawat. (HIC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph