Mokabat sa 21 ka mga balay ang nangaugdaw sa sunog nga miulbo sa nagsagol nga residential ug business establishments sa Barangay Basak, dakbayan sa Lapu-Lapu sa Sabado sa kaadlawon, Pebrero 4, 2023.
Si FO3 Jeffrey Gerodias, fire investigator sa Lapu-Lapu City Fire District, nitug-an sa SunStar Cebu nga wala pay labot niini ang mga balay o establisemento nga naugdaw atol sa insidente sa sunog nga nilungtad og kapin sa usa ka oras.
Alas 8 sa buntag, si Gerodias niingon nga 33 ka mga pamilya ang apektado o 123 ka indibidwal.
Mga tulo ka mga tawo ang gikatahong nakaangkon og non-fatal injuries, matud niya.
Si Carmen Cosep, assistant head sa City Social Welfare and Development Office (CSWDO), niingon nga ang mga nasunogan temporaryong gipapuyo sa Barangay Basak Gym, diin gihatagan sila og mga pagkaon ug dili pagkaon ingon man modular tent nga adunay insulation foam sa CSWDO ug City Disaster Risk Reduction and Management Office (CDRRMO).
Sa laing bahin, si Fire Officer 1 Fritz Diez sa Lapu-Lapu City Fire District-Fire Station 1, niingon nga mokabat sa P375,000 ang danyos sa mga kabtangan sa second alarm fire.
Matud pa ni Diez nga padayon pa ang dugang imbestigasyon aron masuta ang hinungdan sa sunog nga nagsugod sa usa ka lechon house sa George Tampus St. sa nahisgutang barangay.
Gikataho ang sunog alas 3:13 sa kaadlawon ug nakontrolar alas 4:20 sa kaadlawon ug gideklarar nga fire out paglabay sa 10 minutos.
Sa inisyal nga imbestigasyon nasayran nga alas 3 sa kaadlawon nagsugod ang operasyon sa lechon house apan wala pa matino kon duna bay mga empleyado nga nagtrabaho atol sa insidente.
Matud pa ni Gerodias nga abli ang bahin sa main door apan ang kandado niini nagpabilin gihapon.
Hinuon ang imbestigador niingon nga dunay mga tawo nga niangkon nga nakakita sila og duha ka mga empleyado sa maong business establishment nga nilayas tingali tungod sa kalisang. (MKG)