Dalaga nabilanggo tungod lang sa mga pinakete nga instant coffee human nga iya kining gibulsa gikan sa Dolor’s Mini Mart sa Barangay Poblacion Ward II, lungsod sa Minglanilla, kagahapon sa hapon, Pebrero 5, 2023.
Ang dinakpan giila nga si Marites Manulat Labador, 48, dalaga ug taga Barangay Tuburan, Danao City.
Si Labador nasikop pinaagi sa citizens arrest human nga nasakpan sa tag-iya sa maong tindahan nga si Bryan Leyson Adlawan, 27, ug mitabang sa pagdakop ang trabahante sa maong mini mart nga si Junrie Asibes Enabloy, 23.
Si Police Senior Master Sgt. Junel Ater sa Minglanilla Police Station nga nahinabi sa Superbalita Cebu, niasoy nga kaduha nga mibalik og pangumpra ang suspek ug gihulagway nga kadudahan ang linihokan niini ilabi na nga nagbitbit og disposable bag, hinungdan nga gipanid-an.
Nasakpan nga nanguha og mga pinakete nga kape nga wa bayari sa counter ug dali nga mibiya.
Gisita ang maong mangumprahay, gidakop ug gi-turnover ngadto sa kapulisan.
Nakuha gikan sa suspek ang duha ka managlahing brand sa instant coffee nga mga pinakete nga gibana-bana nga mobalor ngadto sa P798.
“Natingala ang taga tindahan kay sige magbalik sa display sa kape. Sus, iyaha naman diay gipangawat,” dugang ni Ater.
Base sa imbestigayon, giangkon ni Labador ang iyang gihimo.
Modus niini nga mangumpra sa mga tindahan sa probinsiya dayon mangawat, matud ni Ater.
Nagtuo sila sa kapulisan nga ang suspek duna pay mga kauban.
Gumikan niini, subayon sab sa kapulisan ang dugang background sa suspek.
Wala nila isalikway ang posibilidad nga daghan na ang nabiktima sa suspek.