MOKABAT sa 21 ka wildlife species ang nakumpiska sa Department of Environment and Natural Resources (DENR)-Soccsksargen gikan sa mga vloggers ug pipila ka mga molupyo sa Tampakan, South Cotabato human makadawat og mga taho gikan sa mga concerned citizen.
Si DENR-Soccsksargen Regional Executive Director Atty. Felix S. Alicer nagpahigayon ug operasyon uban ang composite team gikan sa Enforcement Division, Conservation and Development Division (CDD), Penro South Cotabato, ug Cenro General Santos City aron imbestigahan ug bantayan ang mga taho batok sa mga vloggers bahin sa giingong bird trapping, pagpangayam ug paghimo og bird cage, mga lit-ag nga gipakita sa ilang social media channel nga adunay kapin sa 22 ka libo nga mga subscribers.
Sa pag-abot sa gi-validate nga lokasyon, ang mga vloggers wala sa palibot apan ang grupo nakakita sa usa ka kulongan nga Crested Goshawk ug pipila ka Short-billed Brown Doves sa pinuy-anan sa mga vloggers ug pipila sa ilang mga silingan sa Barangay Danlag.
Si DENR-Soccsksargen Assistant Regional Director for Technical Services Engr. Mama G. Samaon niingon nga ang mga suspek nakalapas sa Republic Act (RA) No. 9147 o ang Wildlife Resources Conservation and Protection Act nga nagdili sa pagpangolekta, pagpangayam o pagpanag-iya sa wildlife. "Giandam na namo ang pagpasaka ug kasong kriminal batok sa mga suspek tungod sa paglapas sa section 27 sa RA 9147," matud ni ARD Samaon.
Si DENR-Soccsksargen Enforcement Division Chief Forester Dirie P. Macabaning nagpasalamat sa Tampakan Municipal Enro ug police station sa pagtabang sa DENR team sa pagluwas sa wildlife species nga gi-turn over na sa DENR-Soccsksargen Regional Wildlife Rescue Center sa Lutayan, Sultan Kudarat para sa saktong pag-atiman ug temporaryo nga kustodiya.
"We advise the public not to capture any wildlife species. Let them live in their natural habitat," hangyo ni Macabaning.