GIBUTYAG sa mga mamaligyaay sa Bankerohan Public Market nga sa kasamtangan ang presyo sa bulak mahimong nagpabilin nga ubos o dunay gamay nga pagtaas ug magpadayon sa pagtaas samtang nagsingabot ang Valentine’s Day.
Tungod sa panginahanglan ug ang limitado niini nga suplay gikan sa mga tigpananum gikan sa Buda ug Calinan, mga presyo sa "decorative" nga bulak, pangunahan sa mga rosas, posibleng mokalit og taas, matud sa mga tag-iya og mga bulak ug namaligya nga nahinabi sa SunStar Davao.
Mga rosas nga dunay mga kolor nga puti, pula, yellow ug pink nagpresyo karon og P150 hangtud P200 matag dosena. Ang usa ka pungpong sa dosena nga rosas nagkantidad og P300 hangtud P600.
Samtang ang mga sunflowers nagkantidad og P100 hangtud P150 matag usa, orchids gibaligya og P500/dosena, baby’s breathe naa sa P200 hangtud P300/dosena depende sa kolor, carnation naa sa P150/bundle, violets naa sa P200/bundle, ug jimba sa P200/bundle.
Kasagaran sa mga mamaligyaay nagsulti nga sa pagsugod pa lang sa Pebrero, nagpataas na sila og P5 hangtud P10 alang sa mga bulak nga ilang gibaligya.
Si Berna Sales, mamaligyaay, nagsulti nga ang ilang suplay nagdeliber karon og 15 dosena karong bulana itandi sa 70 dosena sa normal nga adlaw.
"Tapos next week gi-inform na mi daan na ang flowers motaas na ang presyo sa bulak," matud niya.
Si Lina Ortega, tag-iya og flower shop, nagbutyag sab nga atol sa Pebrero, mga rosas ug uban pang bulak "kay abnormal na ang presyo, abnormal pa ang rasyon".
Gisulti niini nga ang ilang suplayer di lang magdeliber og limitado nga mga bulak, apan nagatumod sab sa ilang mga bulak ngadto sa ubang mga lugar.
"Ga-deliver pud daw sila sa Manila, Cebu, Butuan, Surigao, GenSan," butyag niya.