ANG Davao City Civil Registrar’s Office nagtakdang magtukod og registration centers sa 16 ka halayong barangay karong tuiga ubos sa Indigenous Peoples Civil Registration System program niini.
Ang Davao City adunay average nga annual birth registration nga 35,000, annual death registration nga 8,000, ug annual marriage registration nga 10,000.
Bisan pa, kini nga mga numero dili tukma nga nagpakita sa current population density sa siyudad tungod sa wala matino nga gidaghanon sa mga di rehistrado nga lungsuranon.
Si City Civil Registrar’s Office Head Leo Anthony Braceros misulti sa I-Speak media forum niadtong Huwebes nga ang nangaging mga paningkamot, kulang sa pag-awhag sa tanang lungsuranon sa pagparehistro sa births, marriages ug deaths, ilabi na sa lagyong mga dapit nga adunay pinakataas nga konsentrasyon sa populasyon sa IP.
"We noticed na eveytime mag-conduct ta og mobile registration in very remote areas, naa pa gihapoy mabilin na IPs na unregistered since we cannot stay there for long," niya pa.
Dugang sa opisyal, "That is why we decided to establish a civil registration system right there in their vicinity."
Gikabutyag sab sa opisyal nga ang 16 locations sa 16 barangays gipuy-an sa mga IP citizens kinsa gipang-ila ug gitun-an.
Ang 16 pilot civil registration desks mahimutang kini sa Barangay Gumitan, Marilog Proper ug Baganihan (sa pag-atiman sa mga Matigsalug tribe); Barangay Salaysay, Magsaysay ug Malamba (alang sa Ovu Manuvu); Barangay Dacudao, Baguio Proper ug Tamayong (alang sa mga Klata tribe); ang Barangay Atan-Awe, Daliaon Plantation ug Catigan (alang kini sa mga Tagabawa); samtang ang sa Barangay Mapula, Tapak, Malabog ug Pandaitan (alang kini sa mga Ata tribe).
Pinaagi sa pagbutang og mga civil registration desks niini nga mga komunidad, dili na kinahanglan nga maghulat alang sa usa ka mobile civil registration team nga mobisita kanila.
"Right now, there are 16 barangays taking part of the pilot of the project. The tribal leaders were the ones who selected candidates to become civil registration agents," suma sa opisyal.
Ang mga IP registration agents gihatagan og seminar workshop bahin sa basic civil registration laws. Gibansay usab sila kung unsaon pag-andam sa husto nga birth certificate ug paghimo sa husto nga mga pangutana sa mga kliyente aron mahibal-an ang sayop gikan sa tinuod nga kasayuran.
Matud ni Braceros nga alang sa buwan sa Pebrero tumong sa Civil Registrar's Office nga mopakatap og tulo ka civil registration agents sa tulo ka barangay. (JPC/CIO)