ARON nga makatabang sa mga ginikanan sa kids with disabilities, ang buhatan ni Davao City First Congressional District Representative Paolo Duterte niduso sa paspas nga pag-aprobar sa usa ka lakang nga nagtumong sa paghatag sa mga ginikanan sa mga children with disabilities (CWDs) og P2,000 nga binuwan nga subsidy gikan sa gobyerno.
Kini mao ang House Bill (HB) 6743 nga gisang-at ni Duterte, Benguet Representative Eric Yap, ug Anti-Crime and Terrorism Community Involvement and Support (ACT-CIS) Partylist Reps. Edvic Yap ug Jeffrey Soriano naglatid sa mga rekisitos alang sa mga ginikanan sa mga bata nga may mga baldado aron mahimong kuwalipikado sa subsidy ug nagmando sa paghimo og database sa tanang CWDs aron mahimong makahimo sa epektibong pagpatuman niining gisugyot nga balaod.
Sa pagkutlo sa usa ka pagtuon sa United Nations Children's Fund (Unicef) nga gihimo uban sa koordinasyon sa Department of Social Welfare and Development (DSWD), ang mga tagsulat sa balaudnon nagpunting nga ang gasto sa pagpadako sa usa ka CWD mas taas og 40 ngadto sa 80 porsiyento kaysa sa kids without disabilities.
Nasayran usab sa pagtuon sa Unicef nga ang poverty rates 50 porsiyento nga mas taas sa mga panimalay nga adunay CWDs.
Ubos sa HB 6743, ang CWD nagtumong sa usa ka tawo nga ubos sa 21 anyos nga adunay pisikal o mental nga depekto nga naglimita sa usa o daghan pa sa mga gimbuhaton o kalihokan sa usa ka indibiduwal. Gihisgotan usab nila ang usa ka bata nga adunay rekord sa ingon nga pagkadaot o giisip nga adunay ingon nga pagkadaot, sumala sa balaudnon.
Ang tanang biological parents ug court-appointed guardians sa CWD nga gi-verify ug gi-certify sa DSWD ug sa National Council on Disability Affairs (NCDA), sakop sa maong lakang.
Ang pag-isyu og authentic person with disabilities (PWD) identification card usa ka kinahanglanon aron mahimong kuwalipikado isip benepisyaryo sa subsidy.