Duha ka mga tinun-an sa kursong nursing sa University of Cebu (UC) nga ningluwas sa ginang nga giabis ang liog napasidunggan na sa Cebu City Police Office (CCPO) sa Camp Sotero Cabahug, Gorordo Ave., dakbayan sa Sugbo atol sa flag raising ceremony sa Lunes, Pebrero 6, 2023.
Gihimong pinasidunggang dinapit sa kapulisan sa dakbayan sa Sugbo silang Angyl Fayth Ababat ug Kristianne Joice Ona timaan sa pag-ila sa ilang bayanihong buhat sa ilang pagluwas sa kinabuhi ni Bernadeta Zamora, kinsang liog giingong giabis sa iyang kapuyo nga nagselos.
Si Police Colonel Ireneo Dalogdog, director sa Cebu City Police Office (CCPO), maoy nitunol sa plaque of recognition ug subri nga dunay sud nga cash ngadto sa duha nga giilang ‘mga bag-ong bayani.’
Wala siya nibutyag kon pila ang sulod sa subri, apan matod ni Dalogdog, kini pag-abag sa pamelete sa duha ka mga tinun-an sa UC Banilad campus.
“Ang among role sa community is to serve and protect that is why gitagaan nato’g recognition katong duha ka young women tungod sa ilahang good deeds nga gipakita nga maoy nakasalbar sa kinabuhi sa atong kababayan. Ilang gipakita ang ilang kaisog, ang ilang pagka matinabangon ug ang ilang pagka maluluy-on,” matud ni Dalogdog.
Way kabutangan sa kalipay ang gibati sa duha ka mga tinun-an diin ila ning gihulagway nga sobra na nga blessings gumikan sa sunodsunod nga mga pasidungog nga ilang naangkon.
Matud nilang Angyl Fayth ug Kristianne Joice nga igo lang sila nga ningtabang ug wala magdahom nga ingun niini karon ang bawos nga gihatag kanila.
“It is our utmost gratitude and our utmost thank you’s and it is a worthwhile blessing and it is also murag makagaan sa feelings nga nakatabang mi,” matud ni Ababat.
“A big thank you sa pag recognize sa among life, a little help lang unta sa amoa pero ilang gigrabe pag recognize,” matud ni Ona.
Dili lang sa Sugbo nahimong inila ang duha tungod kay nakita sa tibuok kalibutan ang ilang gihimo diin daghan ang nakadayeg ug nalipay sa ilang gibuhat.
Tungod niini, tinguha nila nga mobisita ni Bernadeta nga naa pa karon sa sulod sa tambalanan aron kumustahon ang kahimtang niini.
Padayon pa nga giatiman sa mga doktor si Bernadeta tungod sa kalawom sa samad sa liog nga naangkon niini apan gihulagway kini sa CCPO nga naa na sa luwas nga kahimtang.
Gawas sa pasidungog sa CCPO, mihatag usab kanila og plaque of appreciation ang Mandaue Eagles Club.