86-anyos naigo sa sin nga nahug gikan sa trak, patay

Tampo
Tampo

Usa ka 86-anyos nga ginang namatay human naigo sa usa ka hugpong sa galvanized plain sheets o sin nga aksidenteng nahulog gikan sa trak de karga sa Riverside sa dalan P. Sanchez, Barangay Canduman, dakbayan sa Mandaue, Dominggo sa buntag, Pebrero 5.

Giila sa mga awtoridad ang namatay nga si Gregoria Cortes, residente sa Zone 6, Riverside, sa Barangay Canduman.

Samtang ang drayber sa cargo truck mao si Joel Estrella, 39, taga Purok Loteral, Santa Cruz, lungsod sa Liloan, amihanan sa Sugbo.

Base sa inisyal nga imbestigasyon, nitabok sa dalan ang biktima dihang aksidenteng nadiskarga ang mga galvanized plain sheet gikan sa cargo truck nga miagi usab sa karsada.

Ang mga sin natumba ngadto sa biktima ug naigo ang iyang ulo ug usa ka bahin sa iyang mga bitiis.

Si Jay Balabas, city nurse ug usa sa mga niresponde sa insidente, niingon nga dul-an sa lima ka minuto ang ilang pagtangtang sa biktima ilawom sa nagtapok nga galvanized sheets. Matud niya nga daling gidala ang biktima aron matambalan sa duol nga tambalanan.

Hinuon, si Police Major Manuel Cabanlit, hepe sa Mandaue City Police Office Station 6 sa Barangay Canduman, niingon sa Lunes, Pebrero 6, nga namatay si Cortes tungod sa grabeng samad sa ulo. (HIC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph