Nangilad ‘migamit’ sa TV show

MIDANGOP: Usa ka ginang nga mag-uuma sa Barangay Gaas, lungsod sa Balamban, Sugbo nagpatabang sa media ug kapulisan human giingong nailad sa social media kay gipatuo sa usa ka caller nga siya nakadaug sa raffle sa programa ni Willie Revillame. / Arnold Y. Bustamante
MIDANGOP: Usa ka ginang nga mag-uuma sa Barangay Gaas, lungsod sa Balamban, Sugbo nagpatabang sa media ug kapulisan human giingong nailad sa social media kay gipatuo sa usa ka caller nga siya nakadaug sa raffle sa programa ni Willie Revillame. / Arnold Y. Bustamante

Usa ka ginang nga mag-uuma sa Barangay Gaas, lungsod sa Balamban nangangkong biktima sa ilad sa social media, nga siya gipatuo nga nakadaog sa raffle sa programa ni Willie Revillame.

Si Rosana (dili tinuod nga ngalan), 42, dunay tulo ka mga anak, usa niini nagtungha sa kolehiyo, nagpuyo sa naasoy nga dapit, unang nidangop sa dyHP RMN Cebu aron magpatabang sa iyang problema.

Matud ni Rosana, niadtong Oktubre 25, 2022, nagtan-aw siya sa programa ni Willie sa Facebook.

Gipa-comment sa host nga si Willie ang mga nanan-aw pinaagi sa pagbutang sa cellphone number ug kompletong ngalan aron maapil sa bola.

Pipila ka gutlo ang milabay, dunay nanawag niya nga nipaila nga staff sa programa ug giingong buot makigsulti si Willie Revillame kaniya.

Ug tungod kay susama man og tingog sa host ang nipuli sa pagkighinabi sa cellphone, siya nituo.

Ang nagpailang si Willie nisulti nga nakadaog siya og P50,000 apan, dason ni Rosana, giputol dayon sa giingong staff ang ilang pakighinabi sa giingong TV host.

Ang nagpailang staff ni Willie nisulti kaniya nga hatagan siya og laing P50,000 isip dugang sa iyang nadaog kang Willie.

Apan duna kini gipangayo nga P2,750 nga processing fee aron makuha niya ang P100,000 ug gipadala kini sa Gcash.

Tungod sa pagtuo nga tinuod nga siya nakadaog, gikuha sa biktima ang ilang tinigom nga kwarta ug miadto sa ilang silingan nga dunay account sa Gcash ug gipadala ang maong kantidad.

Pagka Oktubre 28, 2022, gipangayoan na usab siya og P4,500 isip lifetime insurance fee ug gisundan sa pagka Nobiyembre 3 sa samang tuig nga nangayo og P5,350 isip bayad sa in house audit ug laing P3,400 nga receiving clearance.

Ang katapusan niadtong Nobiyembre 28, 2022, gipangayoan na usab siya og P4,600 nga maoy bayad sa litigation form sa law firm nga nagproseso sa iyang nadaog nga kwarta nga miabot ang tanan og kapin P20,000 ang napadala niya.

Si Rosana nipakita sa Superbalita Cebu sa digital nga mga resibo sa napadala nga kwarta pinaagi sa Gcash.

Iya pa kining gipangutana kon nganong mangayo pa man og kwarta nga unta siya man ang nakadaog, apan nirason ang nanawag kaniya nga mao kini ang patakaran sa ilang kompaniya.

“Akong giingnan nga kon tulong yan sa mahirap bakit lalo pa kaming napahirapan nyan kasi wala nga kaming pera tapos may pahulogan pa pala. Ingun siya ‘hindi, Maam, para din sa inyo ito. Laking tulong na ito sa inyo,” asoy ni Rosana.

Nakapadala siya sa maong kantidad apan nanghuwam og kuwarta sa iyang mga kaila.

Wala gani siya nitug-an ni bisan kinsa nga siya nakadaog sa programa ni Willie Revillame tungod sa kahadlok nga matulis.

Apan wa siya magdahom nga gitulis na diay siya sa nagpailang staff sa TV host human walay niabot nga daug hangtod karon.

Gumikan sa iyang gidangatan, siya nanawagan kang Willie Revillame nga tabangan siya nga mauli ang kwarta nga gitigom nga para unta sa anak nga nagtungha sa kolehiyo.

“Sana masauli lang yung nabigay ko na pera. Malaking halaga na sana yun, sir Willie, sa panggasto sa eskwela ng anak ko. Mahirap lang po kami at sana mabalik yung pera dahil nagkautang kami dahil sa akala namin nanalo kami,” matud ni Rosana.

Ang CIDG Regional Field Unit 7 miawhag sa publiko nga dili dayon motuo sa mga ingun niini nga modus sa social media sanglit daghan na ang nabiktima sa mga mangingilad.

Mihimo na sila og imbestigasyon aron mailhan kinsa ang nangilad kang Rosana ug mabalik ang kapin sa P20,000 nga iyang nahatag.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph