GIBUTYAG sa mga stall vendors sa dakong mall sa may JP Laurel Avenue nga nagpataas na sila og presyo sa sim card sukad Enero karong tuiga tungod sa daghang mga hinungdan.
Kasagaran sa mga mamaligyaay niini nagkanayon nga ang ilang suplayer nagsulti kanila nga patas-an ang presyo sa sim card aron nga buksan ang tuig.
Natumong nga ang sim registration nagsugod og Disyembre 30, 2022, duha ka adlaw una nagsugod ang tuig.
Sukad Lunes, Pebrero 6, 2023, mga mamaligyaay sa Smart ug Talk N Text sim cards nagtaas niini gikan sa P40 ngadto sa P100 matag usa, Globe ug TM sim cards gikan sa P50 ngadto sa P100 ug Dito sim cards gikan sa P90 ngadto sa P100.
Si Lexi Garnica, namaligya og sim card, nagsulti nga wala siyay ideya nganong dunay pagtaas, apan nagtuo siya nga tungod kini sa bag-ong 5G feature sa bag-ong sim cards.
Laing mamaligyaay, kinsa nihangyo nga di panganlan, nagbutyag nga iyang naobserbahan nga nagkadaghan ang mga tawo nga nagreklamo bahin sa pagtaas sa presyo niini.
"Pero wala koy mabuhat kay mao may ingon sa among amo, kung unsay price list gihatag mao na jud to," pagtin-aw niya.
Lain pang mamaligyaay nga wa magbutyag sa iyang pangalan, nagsulti nga naghanyag pa sila og sim card registration nga dunay presyo dugang sa sim card.
Gisulti sa National Telecommunications Commission - Davao Region (NTC-Davao) nga dili kini ubos sa ilang hurisdiksiyon.
Wala pay pahayag ang SunStar Davao gikan sa tulo ka mga telco providers. (ICE)