SAMTANG nangandam ang lokal nga kagamhanan sa Davao alang sa taliabot nga Araw ng Dabaw, magpakatag ang security cluster og 12,000 ka mga personahe alang sa selebrasyon.
"Initially katong gipang-submit sa unit naa to sa mga 9,000 ka personnel but because of the additional accredited events nga gi-recognize ng city mag-adjust gyud mi ani, additional deployment gyud siya so nasa 12,000, almost the same tong last time," si Angel Sumagaysay, Public Safety and Security Office (PSSO) head, nagsulti sa pinaagi sa pinakalit nga interbyu Lunes, Pebrero 6, 2023.
Matud ni Sumagaysay nga ang mga Dabawenyos maglaum og "visibility" sa security cluster sugod sa Marso 1, ang pagbukas sa programa sa kasaulogan sa Araw ng Dabaw.
"There will be police, AFP (Armed Forces of the Philippines), tapos hangtud ni siya sa Parada Dabawenyo kay mao mani siya ang highlight pero actually hangtud gyud ni March 31," butyag niya.
Dugang pa niya nga ang security cluster naa na sa 80 porsiyento nga andam alang sa mga kalihukan sa kasaulogan.
Apan tug-an ni Sumagaysay nga ang ilang kaandam sa Ironman triathlon event wala pa mahingpit.
"Naa pa mi sa mga 60 percent seguro, pero sa isip namo sa security, naka-template naman siya, so what we have to do is to recalibrate katong mga units nga involved, then meetings na pud, then fine tuning, we are ready," tataw pa niya.
Dugang pa niya nga kinahanglan pa nila hapsayon ang ihap sa mga personahe nga ipakatag sa maong kalihukan kay duna silay mga kausaban nga gihimo.