'Rubber planting materials' gikan Zamboanga di palutson sa Cotabato

Hulagway iya sa IDCD-PGO Cotabato
Hulagway iya sa IDCD-PGO Cotabato

TEMPORARYO nga nagdili ang lokal nga panggamhanan sa probinsiya sa Cotabato sa pagpasulod sa rubber planting materials gikan sa probinsiya sa Basilan ug Zamboanga Peninsula nga naglakip sa Zamboanga del Norte, Zamboanga del Sur, ug Zamboanga Sibugay ug sa lima ka siyudad sa Isabela, Dapitan, Dipolog, Pagadian ug Zamboanga, tungod sa kaso sa "Pestaloptiopsis leaf fall disease" nga gikahadlokan karon sa mga mag-uuma sa goma.

Pinaagi niini mapugngan ang pagsulod sa nasampit nga sakit sa probinsiya ug aron maprotektahan ang industriya sa goma nga giila nga usa sa mga nag-unang trabaho sa katawhan.

Kini nga lakang gibase sa Executive Order (EO) 11, series of 2023, nga gilagdaan ni Cotabato Governor Emmylou "Lala" J. Talino-Mendoza niadtong Pebrero 3, 2023, subay usab sa hangyo sa Department of Agriculture-Soccsksargen, sa sulat nga gipaabot sa buhatan sa gobernadora aron maalerto ang mga agriculturist sa dakbayan/munisipyo nga sakop niini aron nga di makubsan ang resin o produksiyon sa rubber.

Pinaagi sa EO 11 nga giluwatan ni Mendoza, gimandoan niini ang Office of the Provincial Agriculturist (OPag) sa pagbuhat sa mosunod: Pagpahigayon og hugot nga inspeksiyon lakip na ang pagmonitor aron dili makasulod sa probinsiya ang rubber planting materials, partikular na gikan sa probinsiya sa Basilan ug Zamboanga Peninsula; Pagpaigmat sa tanang mga agriculturist sa dakbayan/munisipyo nga bantayan pag-ayo ang posibleng impeksiyon sa Pestaloptiopsis sa mga plantasyon sa goma ug nursery ubos sa iyang hurisdiksyon; ug komunikasyon sa Department of Agriculture-Bureau of Plant and Industry, City/Municipal Agriculturist ug Cotabato Police Provincial Office alang sa dinaliang pagpatuman sa nasangpit nga kamandoan.

Kahinumdoman nga sa wala pa mopagawas si Mendoza og EO 11, nakigtagbo na siya sa mga rubber stakeholders sa probinsiya uban sa pipila ka mga eksperto ug gituki ang sunod nga lakang aron malikayan ang maong sakit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph