MOABOT sa lima ang kompirmadong kaso sa "hand, foot, and mouth" (HFM) disease nga nadiparahan sa mga tinun-an sa Matina Central Elementary School sa Davao City sukad sa miaging semana.
Si school principal Marietta Gaer nagsulti sa SunStar Davao niadtong Lunes, Pebrero 6, 2023, nga ang lima ka mga kaso nahitabo sa samang section sa Grade 2 nga klase kon diin usa lang ka tinun-an ang nataptan una kini mikuyanap sa upat pa ka laing tinun-an.
Sukad sa pagsulat ning balita, laing dugang duha pa ka kaso ang padayong gisusi.
"Seguro na-expose siya unya pag-abot sa school, wala nabantayan dayon nga naa diay siya HFM so naa pud uban natakod," tug-an ni Gaer sa paghinabi.
Wala pa makompirma kon ang unang tinun-an nataptan sa HFM sulod sa lagwerta sa tulunghaan o ba kaha sa ilang komunidad ug barangay apan mga opisyal sa tulunghaan ug ginikanan gipahimangnoan na bahin sa posibleng pagpanakod.
Gisulti ni Gaer nga ang titser sa klase unang nakamatikod sa mga sinyales sa HFM sa maong tinun-an ug unya daling mitambag sa mga ginikanan nga magpakonsulta ug ipahibawo gilayon sa tulunghaan kon makompirma na sa doktor.
Ang lima ka tinun-an nga nataptan gitambagan nga mag-isolate sa balay aron nga malikayan ang pagkuyanap sa HFM ngadto sa laing mga tinun-an. Gihatagan sab sila og class modules atol sa ilang pag-abset aron nga padayon gihapon mahibawo sa kalihukan sa tulunghaan.
Sa pagkakaron, ang mga awtoridad sa eskuwelahan naghimo na og "disinfection" klasrom sa Grade 2 class nga dunay nagkasakit niini samtang ang laing lebel gitambagan sab nga mohimo usab niini. Mga tinun-an gidasig sab sa pagparktis og saktong "hand hygiene".
"Gipakusgan namo ang proper handwashing, then alcohol and facemask. Virus kasi ang HFM so social distancing, na wag lang sila mag sigi lapit sa classmate nila (HFM is a virus so we are also encouraging social distancing, to avoid getting too close to their classmates)," tug-an ni Gaer.
Sukad sa pagsulat niini, ang unang tinun-an kinsa nataptan nibalik na sa tulunghaan samtang ang laing upat pa padayon pang nagpaalim sa ilang mga balay.