Pakisabing mayap, sabyan mu nung kapilan magi yang kanaku ing aldo ita—
nung kapilan ding kanakung sala mapupus la at ing lasa para king Nwan a Lagyu
sunlag ya king pusu ku kapamilatan ning upaya ning banal a pakalulu?
Turing kung mengari lakwas pang mababa kesa king taram ning talaib,
daralan ning kapibabatan lub ning pusu ku, papakit ing pamigalang karing sabla,
ing sarili ku linaya king sablang maling dangalan—
kapilan ku atakman ing lasa ning mayumung sabo ning Nwan a Lagyu?
Pibandyan, talatuki, mangalagung babai,
anting milarawan king makalabwad a kawatasan—
e ku pagnasan nanu naman kareting makakatawang tula.
O Ginung Gaurahari, pakisabing mayap pagkaluban mu kung alang kasangkanan
a pamitagulaling karing Tukal mung Bitis, beytan kaybat ning beytan.
Kapilan, ampat gagale ke ing Banal nang Lagyung Ginung Krishna,
ing katawan ku kaya sasal ya king makabusul a saring tula ding amanu ku mabaknal
king panamdam, ampat king putla at malyari ing makabusul galgal,
at kapilan la ring agus ding lwa tumulung parati ibat karing mata ku?
Kapilan king balayan ning Navadwipa, king bebe ilug ning Gangga mamulandit kung padurut, alang male mamaus, “O Gaura! O Nityananda!” teterak at magdalit anting murit,
lalakwan ing sablang pamisalang-alang?
Kapilan Na ku pakalulwan Ginung Nityananda at ibulus na ku king maling kapanwalan
ning pangamakalabwad? Tatabili ing salilung ding Kayang tukal a bitis,
kapilan na ku paymburisan lungub king palengki ning Nwan a Lagyu?
Sali ku at pakyawan ding nyaman ning lagyu nang Hari,
at lubus kung malasing karing sabo ding lasa ning Nwan a Lagyu, mangatulala ku.
Kapamilatan ning pamanagkil karing bitis ding dakilang kaladwa a malyaring numanman karing lasang deta, parati kung mibabad king mayumung pulut ding Nwan a Lagyu.
Kapilan mikapamilingat ning pakalulu para karing sablang misaldak a kaladwa,
at kapilan ing Bhaktivinodang ini, mengalingwan king sarili nang ligaya,
ating mapakumbabang pusu lumwal bang ibulalag kapamilatan ning mapakumbanang pamiyagyag ing makapampan a utus nang Ginung Chaitanya Mahaprabhu?
(Mipamagatanang “Kabe Habe Bolo”- kudta nang Gurung Bhaktivinoda Thakur)
***
Ding keraklang mangadi, anyaran da parati bage manibat keti king yatu at pane pangsaguli at pangsaguli mu naman ing nabang uling pane mung para king katawan ing maulaga para karela uling ala lang malino dalumat o concept ning makadiwang bye o spiritual life. Deti talasalpantaya la karing miyayaliwang uri ning kasalpantayanan—Katoliku at aliwang uri ding Kristyanu, Muslim, Hindu at aliwa pang kasalpatayanan.
E da apusan ing pangading tiru nang Ginung Yesukristo (Ing Pangadi ning Ginu o ing Ibpa Mi) o agyang tatalukyan mu man. King pangading iti makapayuna ing pamagparalampu nang Ginung Yesu Kristo king Ibpa at nayu pa ita pepayuna na na ing “misamban Ya ing Lagyu mu” anting panaganu king pangadi nang miyayampang papuri king Ibpa.
King kadwang sunis na namu inanyad ing balamu makayatung pamangaylangan dapot ita e mu kabud tinape nung e ing pamangaylangan ning kaladwa—ing pamiganaka at pamipuri king Ibpa anting kakanan tamu aldo’ldo. Katuki nita ing pamanyawad mu naman king kapatawran at king pamidayu king tuksu. Nung pakasuryan para ngan king ikakayap ning kaladwa ing pegparalampu ning Ginung Yesu Kristo king Ibpa Na at Ibpa tamu ngan anti king pamagat ning tiru nang pangadi--”Ibpa Mi”--e na sinabing “Ibpa ku” mu.
Alang pangamakasarili. Alang makayatung kapagnasan. Brui da mu apamatulan de ing Ibpa at asopan la ring aliwang kapara dang lelangan. Antita ing pamagparalampu at pangadyan da ring dalise talasuyu ning Kakataskatasang Ibpa.
.
***
Dake Talabaldugan:
1.minaliwa (pangdiwa) meging aliwa, migbayu o menalili king mayap o marok mang paralan. English – changed, renewed, altered, transformed, modified, revised, reworked. Alimbawa king pamangamit: “Bayu pa kanu milyari dapot minaliwa na ing batas dikil king pamakipagkawani ning metung a makiyasawa king asawa na.”
2.minalok/minaluk (pangdiwa) miyampang, midaun nanu mang bage para pamisali o tanggapan, o panusignan. English – one offered something to another, presented, proposed, proffered, overtured. Alimbawa king pamangamit: “E na man kanu kaburyan ing milyari oneng ing babai ing minaluk king pamikatagun inya tinggap na agyang balu na mali.”
3.minalut (pangdiwa) miyampang, midaun nanu mang bage para pamisali o tanggapan, o panusignan. English – one offered something to another, presented, proposed, proffered, overtured. Alimbawa king pamangamit: “E na man kanu kaburyan ing milyari oneng ing babai ing minaluk king pamikatagun inya tinggap na agyang balu na mali.”
***
DIPARAN, KASEBYAN at KABALDUGAN
“Ing taung e byasang balikid king penibatan na, e ya miras keng pupuntalan na.”
Kabaldugan: Kaylangan ing utang a lub karing ninu man a sinaup kekatamu, ding pengari tamu lalu na. Dapot ing utang a lub king Apung Ginu yang e sukat kakalingwan uling iti alang-angga. Ya ing penibatan tamu ngan, pati na ing sablang kaylangan tamu Kaya menibat—pamangan, danum, angin at lalung-lalu na ing bye tamung e malyaring mikawani Kaya.
Saguli mu ing pasalamat Kaya kagising tamu, bayu at kaybat ating gewa at bayu tamu matudtud anting pamibalikid karing sablang pigkalub Na kektamung pakalulu.
***
MIKASING-KABALDUGANG at MISALUNGAT
KABALDUGANG AMANU TAMU
1.ilup – pamaninum a ing pambuk yang gagamitan at akmul ing danum anting asan.
2.ukuk – maralas magagamit nneg inuman ing makaboting inuman.
3.dalukduk – manapnap at maunge pamaninum, magigisan agad ing inuman.
4.alduk – biglang inum a masikan.
5.sipsip – inum a payalduk agnan la ring pambuk at dila.
6.inum – pamanakmul keng danum o nanu mang malyaring inuman.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.