Sa dihang nagplano pa nga molansad pagka mayor ang bana sa usa ka mayor nga padung na motapos sa iyang ika-3 nga termino, daghan ang nagtuo nga magmatngon kini sa iyang mga lakaw kay gusto magpahumot sa mga botante.
Apan sukwahi sa gituhoan sa kadaghanan, nagpabadlong hinuon ang bana.
Human makainom kauban ang mga dalaga nga empleyado sa munisipyo, gitagsa-tagsa paghatod ang mga kauban og inom pero gipaulahi paghatod ang kursonada sa bana.
Sa dihang sila na lang duha, gidala sa bana sa mayor ang dalaga nga empleyado sa gitawag og “biglang-liko” ug didto, gilugos sa bana ang dalaga.
Natuman gyod ang iyang dugay na nga giplano ug napusgay gyod niya ang pagka-babaye sa maong dalaga.
Apan misukol ang babaye ug nipasaka sa kaso nga rape batok sa bana sa mayor.
Niulbo ang kaspa sa mayor sa pagkasayod sa gibuhat sa iyang bana ug tungod sa iyang kasuko, gipalayas niya ang bana gikan sa ilang panimalay.
Pero tungod lagi kay padung na ang kampanya ug maoy plano sa ilang pamilya nga ang iyang bana ang mosunod pagka mayor, napugos ang asawa nga mayor sa pagdawat og balik sa iyang bana bisan kon naundang na ang ilang kasagaran nga buhaton isip magtiayon.
Tuod man, padayon ang plano ug nakandidato ang bana.
Human sa maong panghitabo, ug samtang padayon nga naglawig ang kaso nga rape diin ang babaye nga kihante nidangop sa ahensya og pakitabang, daghan ang nagtuo nga magmatngon na ang bana.
Apan sama sa dili mapugngan ang kauwagan sa bana, padayon kini nga naghimo og mga kalihukan nga sekswal.
Dihay usa ka higayon nga naeskandalo ang bana sa dihang “nagdula kini og kalayo” sulod sa iyang sakyanan ug namatikdan kini sa mga barangay tanod kay dugay nga nagpundo sa maong lugar ug nag-uyog-uyog ang sakyanan. Nakuhaan og hulagway ang sakyanan ug nailhan nga gipanag-iya kadto sa bana pinaagi sa iyang plate number.
Tungod tingali kay dili na matulon sa mga botante, gawas pa nga nag-awas-awas pa ang iyang kahambog, napildi gyod ang bana sa piniliay bisan pa sa nagbaha nga kwarta nga ilang gigamit panahon sa kampanya. Midaog ang ilang kontra bisan pa kon wala kini mamalit sa boto.
Human sa maong kapildihan, daghan na sab ang nagtuo nga mokunsad na ang espiritu santo ug hugasan ug bag-ohon na ang ngil-ad nga kinaiya sa bana.
Apan karong bag-o lang, nalambigit na sab ang bana sa usa ka kaso nga pagpayuhot sa gidiling drugas gamit ang usa ka sakyanan nga nakarehistro sa iyang pangalan.
Giingong sobra sa usa ka kilo ang nasakmit nga gidiling drugas.Samtang nagkugi ang asawa nga magpahumot sa katawhan, apil na ang pagpadaghan sa iyang mga amigo ug kaalyado sa pulitika, padayon ang pagpabadlong sa bana pinaagi sa pagbuhat og krimen nga wala ug tuo.
Karong mga panahona, nagpaabot na lang ang katawhan kon kanus-a gyod kaha mabalhog sa bilanggoan ang badlungon nga bana.