Gisaway ni Pope Francis ang mga balaod nga naghimong krimen sa homosexuality kay di kini makiangayon.
“Being homosexual is not a crime,” nagkanayon ang Santo Papa sa usa ka interview sa Associated Press.
Matud niya, ang homosexual act giila sa simbahan nga usa ka sala. Apan lahi ang sala sa krimen.
Giawhag niya ang mga obispong Katoliko sa pagpaluyo sa mga balaod nga nag-abi-abi sa mga sakop sa lesbian, gay, bisexual, transexual ug queer (LGBTQ) community sa simbahan.
Ang komentaryo ni Pope Francis gidayeg sa gay rights advocates. Mao kini ang labing una nga gipamung sa usa ka Santo Papa mahitungod sa maong mga balaod ug subay kini sa iyang baruganan sa pagdawat sa LGBTQ people sa Simbahang Katoliko.
Apan dunay mokabat sa 67 ka mga nasod sa tibuok kalibutan, kadaghanan sa Africa, nga naghimong krimen sa consensual same-sex sexual activity. Sa maong mga nasod, 11 kanila nagpahamtang sa silot sa kamatayon, sumala pa sa The Human Dignity Trust, nga naningkamot sa pagwagtang sa maong mga balaod.
Sa Estados Unidos, dunay kapin sa usa ka dosena ka mga estado nga adunay anti-sodomy laws bisan pa sa usa ka ruling sa US Supreme Court nga unconstitutional o supak sa Batakang Balaod ang maong mga balaod.
Ang United Nations nagbalikbalik sa awhag niini sa mga nasod nga undangon na ang mga balaod nga naghimong krimen sa homosexuality.
Dunay mga nasod nga nag-decriminalize sa same-sex unions. Ang Angola nagtugot na sa same-sex relationships ug nagdili sa diskriminasyon subay sa sexual orientation.
Apan ang Gabon nibalit-ad sa balaod nga nag-decriminalize sa homosexuality. Gisilotan na hinuon ang gay sex sa pagkapriso sa unom ka buwan ug bug-at nga multa.
Ang High Court sa Botswana pabor sa pag-decriminalize sa homosexuality. Gitangtang sa Mozambique ug Seychelles ang ilang anti-homosexuality laws.
Samtang, usa ka korte sa Trinidad and Tobago nihukom nga unconstitutional ang balaod nga nagdili sa gay sex.
Apan gihugtan sa ubang mga nasod ang balaod nga nagsilot sa homosexuality sama sa Nigeria ug Uganda.
Usa ka korte sa Singapore misalindot sa usa ka petisyon nga naghimong nulo sa balaod batok sa gay sex. Gidasonan sa labawng hukmanan sa Kenya ang balaod nga naghimong krimen sa homosexual acts.
Ang gipasabot sa mga balaod batok sa homosexual acts mao ang pakighilawas sa lalaki ug sa samang lalaki. Apan ang mga nasod nga nagdili sa homosexual acts duna say mga balaod nga nagsilot sa pakighilawas sa babaye ug babaye.
Sa pagkakaron, silot sa kamatayon ang ipahamtang sa same-sex sexual acts sa mga nasod sa Brunei, Iran, Mauritania, Saudi Arabia, Yemen ug sa mga amihanang estado sa Nigeria.
Gi-repeal sa Sudan ang silot sa kamatayon alang sa consensual same-sex sexual acts. (edbarrita@gmail.com)