Patay nga puya napalgan sa dumpsite sa Barangay Lamesa, lungsod sa Balamban, Sugbo nga nasagol sa basurahan sa Lunes, Pebrero 6, 2023.
Si Police Lt. Col. Glenn Hife, hepe sa Balamban Police Station nga nahinabi sa Superbalita Cebu, nagkanayon nga nakadawat sila og tawag sa usa concerned citizen nga nagpahibawo sa napalgan nga puya sa nahisgutang lugar.
Matud ni Hife nga usa ka bata nga nangoykoy og mga basura maoy nakadiskubre sa puya dihang nakuryuso sa nakita nga basiyo nga sudlanan sa ice cream.
Giablihan niini ang sudlanan ug nakurat ang bata kay adunay nagluko nga puya. Gihulagway nga usa ka lalaki ang maong fetus nga gibana-bana nga unom pa lang ka mga buwan.
Si Hife nagkanayon nga ang driver sa garbage truck nibutyag nga ang basura ilang nakuha gikan sa Brgy. Cantuod, Balamban.
Gipadayag niya nga nakig-alayon sila sa barangay alang sa himuong imbestigasyon.
Wala sab isalikway sa kapulisan nga gikan sa laing lugar ang puya nga gilabay lang sa inahan.