Moabot ngadto sa 76 ka mga balay ang gilamoy sa kayo dihang niulbo ang sunog sa Lunes sa alas 10:42 sa gabii sa Purok Sambag, Brgy. San Roque, dakbayan sa Talisay.
Si Chief Insp. Alvin Torion, fire marshall sa dakbayan sa Talisay nga nahinabi sa dySS Super Radyo Cebu, nagkanayon nga ilang giisa sa 3rd alarm ang sunog paglabay sa usa ka oras.
Sumala pa niya nga 64 ka mga balay ang nangaugdaw samtang 12 ang partially damaged.
Base sa imbestigasyon nga ang sunog nagsugod sa balay ni Rona Donguines.
Ang duha ka andanang panimalay giukopar nila Rheinell Tobias, Amelita Orellosa ug Yolanda Ramires Donguines.
Tungod kay ginama sa lights materials ang balay, paspas kini nga gilamoy sa kayo.
Gituohan sa kabomberohan nga faulty electrical wiring o kaha substandard nga appliances maoy hinungdan sa sunog.
Atol sa sunog, nangaangol sila si Athena Donguines, 4; nakuryentihan si Donmark Nebrida, 22; samtang nakaangkon og samad si Frederick Utos, 43.
Samtang usa ka Leo Niez, 34, trabahante sa chorizohan, niluwas sa tulo ka mga menor de edad nga iyang nadunggan nga nagsige og hilak sulod sa usa ka balay.
Si Torion niangkon nga naglisod sila sa pag-penetrate sa dapit tungod sa kahagip-ot sa agianan.
Mokabat sa P625,000 ang danyos sa sunog, diin adunay 91 ka mga pamilya ang naapektuhan kun 394 ka mga indibiduwal.
Si Kapitan Jun Cabrera sa Brgy. San Roque nga nahinabi sa dySS Super Radyo Cebu niingon nga ang apektadong mga pamilya ilang gibutang sa basketball gym, adunay gipahiluna sa mga tunghaan.
Niabag sab ang mga sakop City Social Welfare and Development (CSWD) sa dakbayan sa Talisay.