Biyudo nga no. 1 most wanted person sa probinsiya sa Sugbo nga nag atubang og duha ka mga kasong panglugos ang gidakop sa mga sakop sa Criminal Investigation and Detection Group- Cebu City Field Unit sa Barangay Anislag, lungsod sa Pinamungajan, Sugbo.

Ang akusado giila nga si Tiofnes Quia-ot, alyas Panis, 52, lumolopyo ra usab sa maong lugar nga nalutsan og warrant of arrest sa kasong two counts of rape nga nahitabo niadtong Oktubre 2022. Ang warrant giluwatan ni Judge Judilyn Hugo Tapia Menchavez sa RTC Branch 8, dakbayan sa Toledo, pinitsahan og Pebrero 1, 2023 nga walay gitugot nga piyansa.

Human makuha sa CIDG 7 ang kopya sa warrant of arrest, ila gilayon nga gipaubos sa monitoring ang akusado ug nakadawat sila og impormasyon nga mamista kini sa ilang barangay.

Tuod man ang confidential informant sa CIDG Cebu City Field Unit mipahibawo sa presensiya sa akusado nga giingong niihaw og baboy sa ilang pamilya hinungdan nga gipahigayon ang Oplan Pagtugis nga kabahin sa programa sa CIDG niadtong Lunes sa alas 11:48 sa buntag Pebrero 6, 2023.

Wala magdahom ang akusado nga malutsan siyag warrant of arrest sanglit wala mopakita og interest ang biktima nga wa niya hinganli og si kinsa.